मधेश प्रदेशसभा : सभामुखको निर्वाचन र मुख्यमन्त्रीले विश्वासको मत लिने कार्यसूची

मधेश प्रदेशसभा सचिवालयले मुख्यमन्त्री यादवले विश्वासको मत लिने र सभामुखका लागि उम्मेदवारी दिएका प्रस्तावित नामहरू निर्माणार्थ प्रस्तुत गर्ने कार्यसूची रहेको जनाएको छ।

उकालो

मंगलबार, ३ माघ, २०७९

मधेश प्रदेशसभा : सभामुखको निर्वाचन र मुख्यमन्त्रीले विश्वासको मत लिने कार्यसूची

धनुषा– मधेश प्रदेशसभाको मंगलबार बस्ने बैठकमा सभामुखको निर्वाचन र मुख्यमन्त्री सरोजकुमार यादवले विश्वासको मत लिने कार्यसूची रहेको छ।

नवनिर्वाचित प्रदेशसभाको मंगलबार १ बजे बस्ने दोस्रो बैठकमा मुख्यमन्त्री यादवले विश्वासको मत लिने र सभामुखका लागि उम्मेदवारी दिएका प्रस्तावित नामहरू निर्माणार्थ प्रस्तुत गर्ने कार्यसूची रहेको प्रदेशसभा सचिवालयले जनाएको छ। 

गत बुधबार मुख्यमन्त्री नियुक्त भएका यादवले शुक्रबार (पुस २९ गते) पद तथा गोपनीयताको शपथ लिएका थिए। सभामुखमा सत्ता गठबन्धनका तर्फबाट नेकपा (एमाले)का रामचन्द्र मण्डल र नेपाली कांग्रेसका तर्फबाट जंगीलाल राय प्रतिस्पर्धामा छन्।

एक सय सात सदस्यीय मधेस प्रदेशसभामा सरकार गठनका लागि ५४ मत आवश्यक पर्छ। प्रदेशसभामा रहेका १० राजनीतिक दलमध्ये नेकपा (एमाले), जनता समाजवादी पार्टी (जसपा), जनमत पार्टी, नेकपा (माओवादी केन्द्र), राप्रपा र नेपाल संघीय समाजवादी पार्टी (एक–एक) सहित दुई स्वतन्त्र गरी ६३ जनाको समर्थन छ।

यादवलाई नौ जना प्रदेशसभा सदस्य रहेको लोकतान्त्रिक समाजवादी पार्टी (लोसपा)ले पनि समर्थन गर्ने तयारी गरेकाले त्यो संख्या बढेर ७२ पुग्ने जसपाको दाबी छ।

प्रदेशसभा
मधेश
बैठक
विश्वासको मत
प्रतिक्रिया दिनुहोस !