पर्यटकीय सिजनमै सौराहा सुनसान, होटल अकुपेन्सी ५० प्रतिशतमा खुम्चियो

चितवन– विगतका वर्षमा यतिबेला सौराहाका होटल ८० प्रतिशत हाराहारी भरिने गरेका थिए। यस वर्ष भने आधा मात्र पर्यटक यहाँ आएका छन्।

मुख्य याममा पर्यटक नआउँदा व्यवसायीमा निराशा छाएको छ। क्षेत्रीय होटल संघ चितवनका अध्यक्ष ओमप्रकाश पाण्डे फेब्रुअरी, मार्च र अप्रिल महिना सौराहाको मुख्य पर्यटकीय मौसम भएको बताउँछन्। गत वर्ष यतिबेला होटलका ८० प्रतिशत कोठा भरिने गरेको उल्लेख गर्दै यस वर्ष ५० प्रतिशतभन्दा कम कोठा बुक भएको उनको भनाइ छ।

अध्यक्ष पाण्डेले भने, “एकदमै राम्रो पर्यटकीय याममा पनि किन पर्यटक आएनन्, हामी सोचमग्न छौँ।” यो बेलामा चितवन राष्ट्रिय निकुञ्जमा ढड्डी फाँडेर टाढासम्म देखिने भएकाले सजिलै वन्यजन्तु हेर्न सकिन्छ।

मौसमका हिसाबले पनि धेरै गर्मी र जाडो नहुने भएकाले सबैका लागि उपयुक्त समय यही हो। सबै हिसाबले राम्रो भए पनि विदेशी पर्यटक न्यून मात्र आउँदा व्यवसाय प्रभावित भएको उनको भनाइ छ। सौराहामा मात्र नभएर देशभरकै अवस्था उस्तै रहेको पाण्डेले बताए।

उनले भने, “पर्यटक नआउनुको कारण खोज्नुपर्ने भएको छ।”

संघका उपाध्यक्ष गुणराज थपलिया निर्वाचनका कारण विदेशी पर्यटक नआउँदा सौराहामा पर्यटकको सङ्ख्यामा कमी आएको बताउँछन्। निर्वाचनपछि पर्यटक बढ्ने उनको अपेक्षा छ।

होटल व्यवसायी सुमन घिमिरे निर्वाचनको मुखमै पर्यटकको आगमनमा कमी आएको बताउँछन्। विशेष अवस्थामा निर्वाचन हुन लागेको उल्लेख गर्दै उनले अन्तर्राष्ट्रिय जगत्मा यहाँको अवस्था शान्तिपूर्ण छ भन्ने सन्देश पुग्न जरुरी भएको बताए।

युनाइटेड हात्ती सञ्चालन सहकारी संस्थाका अध्यक्ष दीपेन्द्र खतिवडा गत वर्ष यतिबेला दैनिक चार खेप गर्ने हात्तीले अहिले एक खेप मात्र गर्ने गरेको बताउँछन्। पर्यटकको आगमनमा कमी आएपछि व्यावसायिक रूपमा पालिएका हात्तीका सञ्चालक प्रभावित भएका छन्। रेस्टुरेन्ट व्यवसायीसमेत रहेका खतिवडाका अनुसार पर्यटक नआएपछि सौराहाका रेस्टुरेन्टमा प्रत्यक्ष प्रभाव परेको छ। मुख्य मौसममा पर्यटक घटेपछि पर्यटकीय गतिविधिमा काम गर्ने समग्र व्यवसाय प्रभावित भएको उनले बताए।

बनबास रिसोर्टका महाप्रबन्धक प्रकाश न्यौपाने सौराहामा यो मौसममा पर्याप्त पर्यटक आउने भए पनि यस वर्ष कमी आएको बताउँछन्। होटल क्षेत्रमा लामो अनुभव सँगालेका उनी पर्यटक आउनेमा आशावादी छन्।

सौराहामा १४८ होटल छन्, जहाँ सात हजार २०० पर्यटक अट्ने क्षमता छ। यस क्षेत्रमा प्रत्यक्ष रूपमा ६ हजार ४०० जनाले रोजगारी पाएका छन् भने अप्रत्यक्ष रोजगारी पाउनेको संख्या १२ हजारभन्दा बढी छ। चितवन राष्ट्रिय निकुञ्ज र आसपासका सामुदायिक वनमा दुर्लभ एकसिंगे गैँडा, पाटेबाघ, घडियाल गोही लगायतका दुर्लभ वन्यजन्तु र चराचुरुङ्गी हेर्न यहाँ स्वदेशी तथा विदेशी पर्यटक आउने गर्छन्। यसका अतिरिक्त सौराहामा थारू संस्कृति पनि पर्यटकका लागि रुचिकर बन्दछ। साथै नेपालका विभिन्न सङ्घसंस्था कार्यक्रम गर्न सौराहा आउँछन् भने भारतीय नागरिक पनि बढी मात्रामा यहाँ आउने गर्छन्।