विश्वकप क्रिकेटः इंग्ल्यान्डविरुद्ध पहिला बलिङ गर्दै नेपाल

काठमाडौँ– आईसीसी पुरुष टी२० विश्वकप क्रिकेट प्रतियोगिताको पहिलो खेलमा नेपालले इंग्ल्यान्डविरुद्ध पहिला बलिङ गर्ने भएको छ।

भारतको मुम्बईस्थित वानखडे स्टेडियममा इंग्ल्यान्डका कप्तान ह्यारी ब्रुकले टस जितेर पहिला व्याटिङ रोजेका छन्। नेपालले दुई पटकको च्याम्पियन इंग्ल्यान्डसँग खेल्दै यसपटकको विश्वकपको यात्रा शुरूआत गर्न लागेको हो।

नेपालले यसअघि सन् २०१४ बांग्लादेशमा र सन् २०२४ मा अमेरिकामा भएको विश्वकपमा सहभागिता जनाएको थियो। दुवै पटकको विश्वकपमा नेपालले समूह चरण पार गर्न सकेको थिएन।

नेपालको प्लेइङ ११ मा कुशल भुर्तेल, आसिफ शेख, रोहित पौडेल, दीपेन्द्रसिंह ऐरी, आरिफ शेख, लोकेश बम, गुल्शन झा, करण केसी, शेर मल्ल, नन्दन यादव र सन्दीप लामिछाने छन्।

त्यस्तै इंग्ल्यान्डको प्लेइङ ११ मा फिल साल्ट, जस बट्लर, ज्याकब बेथेल, टम ब्यान्टन, ह्यारी ब्रुक, विल ज्याक्स, साम करान, लियाम डसन, आदिल राशिद, जोफ्रा आर्चर र लुक वूड छन्। विश्वकपमा नेपाल समूह ‘सी’ मा परेको छ। नेपालको समूहमा इङ्ल्यान्डसँगै वेस्ट इण्डिज, इटाली र स्कटल्यान्ड छन्।