टेस्ट राष्ट्र जिम्बावेमाथि नेपालको ६ विकेटको जित

काठमाडौँ— आईसीसी महिला टी–२० विश्वकप ग्लोबल छनोटमा नेपालले पहिलो जित हासिल गरेको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा शनिबार भएको खेलमा टेस्ट राष्ट्र जिम्बावेलाई ६ विकेटले पराजित गरेको हो। 

जिम्बावेले दिएको १३० रनको लक्ष्य नेपालले १९.३ ओभरमा ४ विकेट गुमाएर पूरा गर्‍यो। नेपालको जितमा उपकप्तान पूजा महतोले अविजित अर्धशतकीय इनिङ्स खेलिन्। उनले ५० बलको सामना गर्दै ४ चौका र २ छक्काको मद्दतमा ५२ रन जोडिन्। त्यस्तै, कप्तान इन्दु बर्माले २२, विन्दु रावलले १५ र सम्झना खड्काले ९ रनको योगदान दिए।

यसअघि टस हारेर ब्याटिङको निम्तो पाएको जिम्बावेले निर्धारित २० ओभरमा ६ विकेट गुमाउँदै १२९ रन बनाएको थियो। जिम्बावेका लागि केलिस ध्लोभुले ३६ बलमा ८ चौकासहित ५२ रनको अविजित इनिङ्स खेलिन् भने ओपनर विलोभ्ड बिजाले ३४ रन जोडिन्।

नेपालका लागि बलिङतर्फ रिया शर्माले २ विकेट लिइन् भने कविता कुँवर, पूजा महतो, सीता रानामगर र रुबिना क्षेत्रीले समान १–१ विकेट हात पारे।

यो जितसँगै नेपालको 'सुपर सिक्स' प्रवेशको झिनो सम्भावना कायमै रहेको छ। समूह चरणका सुरुवाती दुई खेलमा थाइल्यान्ड र नेदरल्यान्ड्ससँग पराजित भएको नेपालले अब लिगको अन्तिम खेलमा सोमबार स्कटल्यान्डको सामना गर्नेछ। उता जिम्बावे भने लगातार चार खेल हार्दै प्रतियोगिताबाट बाहिरिएको छ।