डिजिटल युगमा पत्रकारिता र मिथ्या सूचनासम्बन्धी पुस्तक सार्वजनिक

काठमाडौँ– डिजिटल युगमा पत्रकारिता, मिथ्या सूचना र तथ्यजाँचसम्बन्धी तीन वटा पुस्तक सार्वजनिक गरिएका छन्। सेन्टर फर मिडिया रिसर्च नेपाल र जर्नलिजम एकेडेमीद्वारा शुक्रबार आयोजित कार्यक्रममा ‘डिजिटल युगमा पत्रकारिता’, ‘मिथ्या सूचना र तथ्यजाँच’का साथै ‘डिजिटल परिदृश्य’ पुस्तक विमोचन गरिएको हो। 

‘डिजिटल युगमा पत्रकारिता’ पुस्तक जर्मनीका पत्रकारहरू स्टेफान मोल र तन्जिभ शुल्जले लेखेका हुन्। जर्मन भाषाको यो पुस्तकलाई लक्ष्मण श्रेष्ठ, तिलक पाठक र उज्ज्वल आचार्यले नेपालीमा अनुवाद एवं सम्पादन गरेका हुन्। पुस्तकमा डिजिटलाइजेसनको युगमा मिडिया र पत्रकारिता, पत्रकारिताका शैली, सम्पादकीय व्यवस्थापन, सम्पादकीय जिम्मेवारी र पत्रकारिताको गुणस्तर लगायतका पक्षको चर्चा छ।

उज्ज्वल आचार्य र उमेश श्रेष्ठले लेखेको ‘मिथ्या सूचना र तथ्यजाँच’सम्बन्धी पुस्तकमा मिथ्या सूचना, यसको प्रतिकार, तथ्यजाँच प्रक्रिया र मिडिया साक्षरतालगायतका विषय समावेश छन्।

त्यस्तै, ‘डिजिटल परिदृश्य’ पुस्तक पत्रकार तथा त्रिभुवन विश्वविद्यालयका उपप्राध्यापक ऋषिकेश दाहालले लेखेका हुन्। यस पुस्तकमा प्रतिमान परिवर्तनमा पत्रकारिता, अनलाइन समाचारको मूल्य, डिजिटल मिडिया र पत्रकारिता, युट्युबमा सम्पादकहरूको यात्रा र समाचारमा प्रतिलिपि अधिकारसहितका विषयलाई केलाइएको छ।

कार्यक्रममा नेपाल पत्रकार महासंघकी अध्यक्ष निर्मला शर्माले पत्रकारिता र सामाजिक सञ्जालमा मिथ्या सूचनाको प्रभाव बढ्दै गएको उल्लेख गर्दै निर्वाचनका बेला हुन सक्ने मिथ्या सूचनाप्रति सजग हुन जरुरी रहेको बताइन्।

वरिष्ठ पत्रकार प्रतीक प्रधानले प्रविधि, सोसल मिडिया र नागरिक पत्रकारिताका कारण मूलधारको पत्रकारितामा चुनौती थपिएको र अब पत्रकारिताले जनविश्वास जगाउन सक्नुपर्ने धारणा व्यक्त गरे।

‘डिजिटल युगमा पत्रकारिता’का लेखक स्टेफान मोलले विज्ञापन इन्टरनेटमा आधारित मिडियामा केन्द्रित हुँदै गइरहेको र पत्रकारहरू मिथ्या सूचनाविरुद्ध लड्नुपर्ने भएकाले पत्रकारितामा चुनौती थपिएको बताए। सेन्टर फर मिडिया रिसर्च नेपालका अध्यक्ष नवीन खतिवडाले नेपालमा निर्वाचनका बेला मिथ्या सूचनालाई न्यूनीकरण गरी सत्यलाई स्थापित गर्न आवश्यक रहेको बताए।