काठमाडौँ– काठमाडौँमा तेस्रो लगानी सम्मेलन शुरू भएको छ। ५५ देशका एक हजार ६०० लगानीकर्ता सहभागी सम्मेलनको आइतबार प्रधानमन्त्री पुष्पकमल दाहाल ‘प्रचण्ड’ले उद्घाटन गरेका हुन्।
मुलुकमा प्रत्यक्ष वैदेशिक लगानी भित्र्याएर कलकारखाना, उद्योगधन्दा स्थापनालगायत आर्थिक उन्नयनका परियोजना कार्यान्वयन गर्ने लक्ष्यका साथ तेस्रो लगानी सम्मेलन आयोजना गरिएको अर्थमन्त्री वर्षमान पुनले बताए। दुई दिनसम्म चल्ने यो सम्मेलन लगानीकर्ताका लागि महत्त्वपूर्ण अवसर रहेको उनको भनाइ छ।
लगानीका निम्ति प्रस्तुत गरिने परियोजनासम्बन्धी विस्तृत विवरणसहितका २३ वटा प्रदर्शनी कक्ष सम्मेलनस्थलमा राखिएका छन्। साथै १९ वटा परियोजनाका लागि आशयपत्र आह्वान गरिने कार्यक्रम छ।
सरकारले यसअघि २०७३ फागुन १९ र २० गते पहिलो तथा २०७५ चैत १५ र १६ गते दोस्रो लगानी सम्मेलन आयोजना गरेको थियो।