काठमाडौँ– नेपाल आयल निमगले पेट्रोलियम पदार्थको मूल्य घटाएको छ। निगम सञ्चालक समितिको बैठकले सोमबार राति १२ बजेदेखि लागू हुने गरी डिजेल, पेट्रोल र मट्टितेल तथा हवाई इन्धनको मूल्य घटाएको हो।
मुलुकको भौगोलिक क्षेत्रलाई तीन वर्गमा विभाजन गरी इन्धनको मूल्य समायोजन गरिएको निगमले जनाएको छ। डिजेल, पेट्रोल र मट्टितेलको मूल्यमा प्रतिलिटर पहिलो वर्गमा ७.५० पैसा, दोस्रो वर्गमा ६ र तेस्रो वर्गमा ५ रुपैयाँका दरले मूल्य घटाइएको निगमका प्रवक्ता मनोज ठाकुरले जानकारी दिए।
पहिलो वर्गका क्षेत्रमा पेट्रोलको मूल्य प्रतिलिटर १६७.५० रुपैयाँ, दोस्रो वर्गका क्षेत्रमा १६९ र तेस्रो वर्गका क्षेत्रमा १७० तोकिएको छ। यसअघि पेट्रोलको मूल्य देशभर प्रतिलिटर १७५ थियो।
यस्तै, डिजेल र मट्टितेलको मूल्य पहिलो वर्गका क्षेत्रमा १४७ रुपैयाँ ५० पैसा, दोस्रो वर्गका क्षेत्रमा १४९ र तेस्रो वर्गका क्षेत्रमा १५० रुपैयाँ निर्धारण गरिएको निगमले जनाएको छ।
निगमले चारआली, विराटनगर, जनकपुर, वीरगन्ज, अमलेखगन्ज, भलबारी, नेपालगन्ज र धनगढीलाई पहिलो, सुर्खेत र दाङलाई दोस्रो तथा काठमाडौँ, पोखरा र दिपायललाई तेस्रो वर्गमा राखेको छ।
निगमले हवाई इन्धन (आन्तरिकतर्फ) प्रतिलिटर १४ रुपैयाँ र अन्तर्राष्ट्रियतर्फ प्रतिकिलोलिटर ११५ अमेरिकी डलरले मूल्य घटाएको छ। खाना पकाउने एलपी ग्यासको मूल्य भने यथावत् राखिएको छ।
