बिमा समिति बन्यो बिमा प्राधिकरण

काठमाडौँ - बिमा व्यवसायको नियमन गर्दै आएको बिमा समिति आजबाट बिमा प्राधिकरणमा रूपान्तरण भएको छ। 

बिमा ऐन २०७९ कार्यान्वयनमा आएसँगै समितिको सम्पूर्ण कामकारबाही प्राधिकरणमा रूपान्तरण भएको हो। 

भदौ अन्तिममा संघीय संसद्‌बाट पारित भएको बिमा विधेयक असोज २२ गते राष्ट्रपति विद्यादेवी भण्डारीबाट प्रमाणीकरण भएको हो। 

राष्ट्रपतिबाट प्रमाणीकरण भएको १ महिनामा लागू हुने कानुनी प्रावधानअनुसार बिमा ऐन मंगलबारबाट लागू हुँदै छ। मंगलबार नै समिति प्राधिकरणमा रूपान्तरण भएको औपचारिक घोषणा हुँदैछ।