चुनाव प्रचारमा टोपी प्रयोग गरेको भन्दै प्रचण्ड, नारायणकाजी र रविलाई स्पष्टीकरण

काठमाडौं– निर्वाचन आयोगले नेकपा माओवादी केन्द्रका अध्यक्ष एवं गोरखा-२ का प्रतिनिधिसभा सदस्यका उम्मेदवार पुष्पकमल दाहाल ‘प्रचण्ड’, सोही पार्टीका उपाध्यक्ष नारायणकाजी श्रेष्ठ र राष्ट्रिय स्वतन्त्र पार्टीका अध्यक्ष एवं प्रतिनिधिसभा सदस्यका चितवन-२ का उम्मेदवार रवि लामिछानेलाई स्पष्टीकरण सोधेको छ। आयोगले उनीहरूलाई निर्वाचन प्रचारप्रसारका क्रममा टोपी प्रयोग गरेको सम्बन्धमा स्पष्टीकरण सोधेको हो।

अध्यक्ष दाहाल र उपाध्यक्ष श्रेष्ठसमेत उपस्थित कार्यक्रममा केही व्यक्तिले हँसिया हथौडाको संकेत रहेको नेपाली टोपी प्रयोग गरेको सम्बन्धमा आयोगमा प्राप्त उजुरीका आधारमा स्पष्टीकरण सोधिएको आयोगले जनाएको छ। यस्तै, 'रवि लामिछानेलाई विजयी बनाऔँ, यसपालिको मतदान रवि लामिछानेलाई' भन्ने ब्यहोरा छापिएको टोपी प्रयोग गरेको भनी आएको उजुरीका आधारमा लामिछानेलाई स्पष्टीकरण सोधिएको आयोगको भनाइ छ।

विद्युत् नियमन आयोगका अध्यक्ष सिंहलाई स्पष्टीकरण
त्यस्तै, आयोगले विद्युत् नियमन आयोगका अध्यक्ष दिल्लीबहादुर सिंहलाई ऊर्जामन्त्री एवं ललितपुर-३ का प्रतिनिधिसभा सदस्यका उम्मेदवार पम्फा भुसालविरुद्ध सामाजिक सञ्जालमा पोस्ट गरेको विषयमा स्पष्टीकरण सोधेको छ।

सिंहलाई ऊर्जामन्त्रीले गरेका जलविद्युत् क्षेत्रका गलत क्रियाकलापहरू भनी १० बुँदा आफ्नो सामाजिक सञ्जाल फेसबुकमा राखेको भन्ने जानकारीका आधारमा स्पष्टीकरण सोधिएको आयोगले जनाएको छ। निर्वाचन आचारसंहितामा कुनै राजनीतिक दल वा उम्मेदवारको पक्ष वा विपक्षमा प्रचारप्रसारमा संलग्न हुन वा प्रचारप्रसार गर्न नहुने व्यवस्था छ। 

उम्मेदवार रिजाललाई स्पष्टीकरण

आयोगले पर्सा-४ का प्रतिनिधिसभा सदस्यका नेपाली कांग्रेसका उम्मेदवार रमेश रिजालले जिल्लास्थित आचारसंहिता अनुगमन अधिकृतका रूपमा रहेका प्रमुख कोष नियन्त्रक रुद्रबहादुर कार्कीलाई धम्की दिएको सम्बन्धमा स्पष्टीकरण सोधेको छ।आचारसंहिता विपरीतका निर्वाचन प्रचारप्रसार सामग्री हटाएको विषयमा रिजालले कार्कीलाई धम्की दिएको विषयमा आयोगमा लिखित उजुरी आएको आयोजले जारी गरेको बुलेटिनमा उल्लेख छ।

प्रचारप्रसारमा बालबालिका प्रयोगबारे स्पष्टीकरण
आयोगले लोकतान्त्रिक समाजवादी पार्टीका अध्यक्ष एवं महोत्तरी-३ का प्रतिनिधिसभा सदस्यका उम्मेदवार महन्थ ठाकुर, नेकपा (एमाले)का तर्फबाट प्रदेशसभा सदस्यका दाङ-३ (२) का उम्मेदवार हुकुमबहादुर बस्नेत र प्रतिनिधिसभा सदस्यका झापा-२ का स्वतन्त्र उम्मेदवार भद्रप्रसाद नेपाललाई पनि स्पष्टीकरण सोधेको छ।

स्पष्टीकरणपत्रमा ठाकुरले बालबालिकालाई आफ्नो निर्वाचन चिह्न अंकित पम्प्लेट लिई वितरण गर्न हिँडिरहेको देखिने सामग्री संलग्न गरी आयोगमा उजुरी प्राप्त भएको, बस्नेतले आफ्नो निर्वाचन प्रचारप्रसार गर्दा बालबालिकाको प्रयोग गरेको फोटोसमेतको सामग्री आयोगमा प्राप्त भएको तथा नेपालले बालबालिकाको समूहमा हात मिलाउँदै ‘भोट केमा खुकुरीमा’ भनी नारा लगाउन लगाएको देखिने श्रव्यदृश्य सामग्री संलग्न गरी आयोगमा उजुरी प्राप्त भएको उल्लेख छ।