बचतकर्ताको खातामा पहुँच पुर्‍याएर ११ लाख रकमान्तर, २१ वर्षीय युवक पक्राउ

काठमाडौँ– बैंकको कर्मचारी हुँ भन्दै बचतकर्ताको खातामा पहुँच पुर्‍याएर एक व्यक्तिले लाखौँ रकम आफ्नो खातामा रकमान्तर गरेका छन्। 

मोरङका २१ वर्षीय महमद मोजाहिद मियाँले बोनस प्राप्त हुने लोभ देखाएर पीडितको बैंक खातामा पहुँच पुर्‍याई रकम आफ्नो खातामा ट्रान्सफर गरी ठगी गरेको पाइएको हो। यसरी उनले अहिलेसम्म ११ लाख १२ हजार ८०० रकमान्तर गरी ठगी गरेको पाइएको छ। 

काठमाडौँ उपत्यका अपराध अनुसन्धान कार्यालयका प्रहरी उपरीक्षक रवीन्द्र रेग्मीका अनुसार उनले सुरुमा पीडितलाई मोबाइलबाट फोन सम्पर्क गरी विभिन्न बैंकको आधिकारिक कर्मचारी हुँ भन्दै बैंक खातासँग वालेट आईडी लिंकअप, खाता नवीकरण, केवाईसी फर्म अपडेट, स्टेटमेन्ट भेरिफाइ गरिदिने आश्वासन दिए। 

त्यसो गर्दा पैसा नलाग्ने र राम्रो बोनस प्राप्त हुने गरी काम गरिदिने भनी लोभ देखाएर विश्वासमा पारे। त्यसपछि पीडितकै बैंक खातालगायत, ओटीपी कोडसमेत मागी खातामा पहुँच पुर्‍याएर अन्यत्र बैंक खाता तथा वालेटमा पैसा रकमान्तर गरेको फेला परेको रेग्मीले बताए। 

उक्त घटनामा जाहेरी परेपछि उनलाई ठगीसम्बन्धी कसुरमा पक्राउ गरी जिल्ला प्रहरी परिसर काठमाडौँमार्फत थप अनुसन्धान गरिरहेको छ।