मलेसियामाथि नेपालको दोस्रो जित, सिरिजमा अग्रता

काठमाडौँ– नेपालले घरेलु टोली मलेसियासँगको महिला टी२० आई सिरिजमा अग्रता लिएको छ।

बिहीबार सम्पन्न तेस्रो खेलमा नेपालले २७ रनको जित हासिल गरेको हो। योसँगै नेपालले ५ खेलको सिरिजमा २–१ को अग्रता बनाएको छ।

नेपालले दिएको १११ रनको लक्ष्य पछ्याएको मलेसियाले निर्धारित २० ओभरमा ४ विकेट गुमाउँदै ८३ रन मात्रै बनाउन सक्यो। मलेसियाकी माहिरा इज्जती इस्माइलले सर्वाधिक ४४ रन बनाइन्।

उनले ५४ बलमा ६ चौका प्रहार गरिन्। ओपनर विनी फ्रेड दुराईसिंघमले ३८ बलमा १ चौकासहित २० रन जोड्दा अन्य ब्याटरको प्रदर्शन राम्रो हुन सकेन।

वान जुलिया ६, मास अलिशा २ रनमा आउट हुँदा इना हमीजा हाशिम डक आउट भइन्। आइना नजवा ९ रनमा अविजित रहिन्।

नेपालकी कविता कुँवर, सीता रानामगर र इन्दु वर्माले १/१ विकेट लिइन्।

त्यसअघि यूकेएम–वाईएसडी क्रिकेट ओभिल्‌मा टस हारेर पहिले ब्याटिङ गरेको नेपालले निर्धारित २० ओभरमा ५ विकेट गुमाउँदै ११० रन बनायो।

नेपालकी कप्तान रूविना क्षेत्री बेलबासेले सर्वाधिक २७ रन बनाइन्। उनले १५ बलमा ३ चौका प्रहार गरिन्।

चौथो नम्बरकी ज्योती पाण्डेले २४ बलमा ३ चौकासहित २३ रन बनाइन्। इन्दु वर्माले २०, सीता रानामगरले २१ र कविता कुँवरले २ रन जोडे।  कविता जैशी १ र विन्दु रावल ३ रनमा अविजित रहे। 

मलेसियाकी निक नूरले २ विकेट लिइन्। विनी फ्रेड दुराईसिंघम र ऐश्या एलिशाको नाममा १/१ विकेट रह्यो।

नेपाल पहिलो खेलमा मलेसियासँग ५ विकेटले पराजित भएको थियो। दोस्रो खेलमा भने ७ विकेटको जित हासिल गर्दै सिरिजमा फर्किएको थियो।