कर्णालीमा नयाँ सरकार गठन हुँदै, माओवादीका शर्मा मुख्यमन्त्री

काठमाडौँ– कर्णाली प्रदेशमा बुधबार नयाँ सरकार गठन हुने भएको छ।

माओवादी संसदीय दलका नेता राजकुमार शर्माले पाँच वर्षका लागि मुख्यमन्त्रीमा दाबी पेस गर्दै छन्। सत्ता गठबन्धनमा भएको भागबन्डाअनुसार शर्माले गठबन्धनका सांसदको समर्थनमा प्रदेश प्रमुख तिलक परियारसमक्ष दाबी पेस गर्ने तयारी गरेका हुन्।

प्रदेश प्रमुख परियारले संविधानको धारा १६८ उपधारा २ बमोजिम सरकार गठनका लागि एक हप्ता समय दिएका थिए। सो समय बुधबार साँझ पाँच बजे सकिँदै छ। ४० सदस्यीय कर्णाली प्रदेशसभामा माओवादीका १३, एमालेका १०, राप्रपा, एकीकृत समाजवादी र स्वतन्त्र सांसद एक/एक जना छन्।  

१४ सिट रहेको सबैभन्दा ठुलो दल कांग्रेस प्रतिपक्षमा बस्ने भएको छ।