प्रदीप ज्ञवाली भन्छन्- चलिरहेको छलफल सरकारकाे दायरा विस्तार गर्नमा मात्र सीमित छ

काठमाडौँ– नेकपा एमालेका उपमहासचिव प्रदीप ज्ञवालीले एकीकृत समाजवादीसँग तत्काल एकताको सम्भावना नरहेको सङ्केत गरेका छन्।

अहिले चलिरहेको छलफल सरकारको समर्थन र दायरा विस्तारमा मात्र सीमित भएको उनको भनाइ छ। नयाँ सरकार गठनसँगै पछिल्लो समय एमाले र एकीकृत समाजवादीबिच पार्टी एकता हुने पनि चर्चा भइरहेको छ। 

शुक्रबार बिहान सामाजिक सञ्जालमार्फत उपमहासचिव ज्ञवालीले भनेका छन्, “अहिले चलिरहेको छलफल सरकारको समर्थन- दायरा विस्तार गर्नमा सीमित छ। त्यसभन्दा बाहिर चलेका चर्चा अनुमान, अतिरञ्जना र हल्ला मात्र हुन्। पार्टीभित्र र बाहिरबाट सिर्जित भयानक घेराबन्दी तोडेर आन्दोलन यहाँसम्म आइपुगेको हो।”

सङ्कटका बेला सतिसालझैँ उभिएका नेता कार्यकर्ताको भावनाविपरीत कुनै निर्णय नहुने उनले लेखेका छन्। इतिहासका केही घटना बिर्सन नसकिने र बिर्सन नहुने खालको हुने ज्ञवालीको भनाइ छ।