काठमाडौँ– काठमाडाैँ-तराई/मधेश द्रुतमार्ग निर्माणको काम २६ प्रतिशत सकिएको छ। नेपाली सेनाले जिम्मा लिएको काठमाडौँ-तराई/मधेस द्रुतमार्ग सडक आयोजना निर्माणको कामको आर्थिक वर्ष २०७९/८० को साउन मसान्तसम्मको भौतिक प्रगति २६.१४ प्रतिशत भएको जानकारी गराइएको छ। आइतबार नेपाली सेनाले पत्रकार सम्मेलमार्फत सो सडक आयोजनाको कार्य प्रगति विवरण सार्वजनिक गरेको हो।
आयोजनाको मोबिलाइजेसनसहित वित्तीय प्रगति भने २८.११ प्रतिशत रहेको काठमाडौँ–तराई/मधेस द्रुतमार्ग सडक आयोजना प्रमुख कमलविक्रम शाहले जानकारी दिए। उनले आयोजनाको समष्टिगत कार्य योजना मुताविकका ११ वटा क्लस्टर अन्तर्गतका १३ वटा निर्माण प्याकेजमध्ये १ देखि ७ नम्बर सम्मका प्याकेजहरू निर्माणाधीन अवस्थामा रहेकाे बताए। उनका अनुसार द्रुतमार्गको सिस्नेरी तथा मख्खुबेंसी खण्ड अन्तर्गत पर्ने प्योकेज नम्बर ८क, ९क र ९खको द्रुतमार्गको मख्खुबेंसी तथा सिस्नेरी खण्डको प्याकेज नम्बर ८क, ९क र ९खको २०८० साल भाद्र १३ गते बोलपत्र खुलेर मूल्यांकन भइहेको छ।
त्यसैगरी द्रुतमार्गको मख्खुबेंसी तथा महादेवटार खण्डमा पर्ने प्याकेज नम्बर ८ ख र १० को २०८० साल भाद्र १ गते बोलपत्र आह्वान भएको छ। प्रमुख शाहका अनुसार आयोजनाको करिब ९५ प्रतिशत प्याकेजहरू कार्यान्वयन तथा खरिद प्रक्रियामा प्रवेश गरिसकेको छ। उनले आयोजनाको प्याकेज नम्बर ११ अन्तर्गत पर्ने खोकना इलाकामा द्रुतमार्गको शुरू विन्दु निर्धारण, सवारी आवागमन व्यवस्थापन सम्बन्धी निर्णय र जग्गा अधिग्रहण विवाद समाधान पश्चात खरिद प्रक्रिया शुरू गर्नेगरी तयारी अवस्थामा रहेको पनि जनाए।
हालसम्म निर्माणाधीन तीन वटा सुरुङमार्गहरूको जम्मा लम्बाई ६.४१ किलोमिटरमध्ये २.६६७ किलोमिटर सुरुङ निर्माण कार्य सम्पन्न भएको आयाेजनाले जनाएकाे छ। जुन प्रतिशतमा ४१.५७ प्रतिशत हुन आउँछ। जसअनुसार महादेवटार सुरुङमार्गको जम्मा लम्बाई ३.३५५ किलोमिटरमध्ये हालसम्म १.३८७ किलोमिटर, धेद्रे सुरुङमार्गको जम्मा लम्बाई १.६३ किलोमिटरमध्ये हालसम्म ६१९ मिटर र लेनडाँडा सुरुङमार्गको जम्मा लम्बाई १.४३ किलोमिटरमध्ये हालसम्म ६६१ मिटर सुरुङ निर्माण कार्य सम्पन्न भएको छ। आयाेजनाका प्रमुख शाहका अनुसार हालसम्म ठेक्का व्यवस्थापन भई कार्यान्वयनमा रहेका प्याकेज नम्बर १ देखि ५ सम्मका ४५ वटा पुलहरूको डिजाइन सम्पन्न भइसकेका १ हजार ७ सय ६८ वटा पाइलहरूमध्ये १ हजार ५३ वटा पाइलको निर्माण कार्य सम्पन्न भइसकेको छ।
आयोजना निर्माणका लागि जम्मा १५ हजार ४ सय १६ रोपनी जग्गा अधिग्रहण गर्नुपर्ने र जसमध्ये सरकारी जग्गा १० हजार २ सय ४४ तथा व्यक्तिगत जग्गा ५ हजार १ सय ७२ रोपनी रहेको छ। व्यक्तिगत जग्गामध्ये हालसम्म ४ हजार ७ सय ६६ रोपनी जग्गा अधिग्रहण भइरहेको र ४०६ रोपनी जग्गा अधिग्रहण हुन बाँकी रहेको प्रमुख शाहले स्पष्ट पारे। उनले स्वीकृत वातावरणीय प्रभाव मूल्यांकन प्रतिवेदन बमोजिम कटान गर्नुपर्ने ३८ हजार ६ सय ६४ वटा रुखहरूमध्ये हालसम्म २८ हजार ६ सय ४६ वटा रुखहरू कटान भएको र बाँकी १० हजार १८ वटा रुखहरू कटान गर्ने प्रक्रियामा रहेको बताए।
उनका अनुसार कटान गरिएका रुखहरूको बदलामा १ अनुपात २५ का दरले ७ लाख १६ हजार १ सय ५० बिरुवाहरू रोप्नुपर्नेमा हालसम्म जम्मा ५३७ हेक्टरमा ६ लाख ४३ हजार ६ सय ९५ बिरुवा रोपिएको छ।
प्रस्थान विन्दु खोकना र अन्तिम विन्दु निजगढ रहेको यस काठमाडौँ-तराई/मधेस द्रुतमार्ग सडक आयोजनाको कुल लम्बाई ७०.९७७ किलोमिटर रहेको छ। मिति २०७४ जेठ १४ गते तत्कालीन प्रधानमन्त्री पुष्पकमल दाहालले निजगढमा शिलान्यास गरी निर्माण कार्य प्रारम्भ भएको यस आयोजनाको २०८० साल साउन ३० गते स्वीकृत भएको आयोजनाको परिमार्जित डीपीआर बमोजिम २०८३ साल चैत मसान्तसम्ममा निर्माण सम्पन्न गर्ने लक्ष्य राखिएको छ।
यस आयोजनाको कुल लागत २ खर्ब ११ अर्ब ९३ करोड रुपैयाँ रहेको छ। नेपाली सेनालाई आयोजना निर्माण व्यवस्थापनको जिम्मेवारी दिएपछि आ.व.२०७९/८०सम्म कुल ४९.२३ अर्ब खर्च भएको प्रमुख शाहले बताए। उनका अनुसार चालु आर्थिक वर्षमा आयोजनालाई २२ अर्ब ५१ करोड रुपैयाँ विनियोजन भएको छ।