इन्द्रजात्रामा महाकाली नाच प्रस्तुत

काठमाडौँको हनुमान ढोका दरबार स्क्वायरमा इन्द्रजात्राको अवसरमा महाकाली नाच प्रस्तुत गरिएको छ। यो नाच नेवार परम्पराको एक महत्त्वपूर्ण धार्मिक नृत्य हो, जसले देवी पूजा र राक्षसको संहारको प्रतीकलाई जनाउँछ। विशेष गरी भाद्र महिनामा इन्द्रजात्रा र गाईजात्राको समयमा यो नाच देखाइन्छ।

यस नाचमा कलाकारहरूले विभिन्न देवी-देवता तथा पात्रहरूको भूमिका निर्वाह गर्छन्। ती पात्रहरूमा महाकाली, महालक्ष्मी, कुमारी, मुस्क्याखो, दैबग्य, खर्बुजा, मखा फ्यान, फाइजु, ब्याञ्जु, र गलेशी पुंखा देवी प्रमुख छन्।

यो नाच सातवटा समूह मिलेर प्रस्तुत गरिन्छ। ती समूहहरू हुन्: खर्बुजा, दैबग्य, मुस्क्याखो, गलेशी पुंखा देवी, मखा फ्यान, फाइजु र ब्याञ्जु। भक्तपुरमा यसलाई 'दि प्याखं' (देवी नाच) भनेर पनि चिनिन्छ। यस नाचलाई पुरातत्त्व विभागले अमूर्त सम्पदाको रूपमा दर्ता गरेको छ।

महाकाली नाच वर्षमा दुई पटक मात्र प्रदर्शन गरिन्छ: इन्द्रजात्राको अवसरमा काठमाडौँमा र गाईजात्राको अवसरमा भक्तपुरमा।