कमला नगरपालिकाका तत्कालीन प्रमुखसहित १० जनाविरुद्ध भ्रष्टाचार मुद्दा

काठमाडौँ– अख्तियार दुरुपयोग अनुसन्धान आयोगले धनुषाको कमला नगरपालिका  तत्कालीन नगरप्रमुख राम उदगार गोइतसहित १० जनाविरुद्ध बिहीबार विशेष अदालत, काठमाडौँमा आरोपपत्र दायर गरेको छ।

आयोगका प्रवक्ता राजेन्द्रकुमार पौडेलका अनुसार लग्मा बजार नजिकको पोखरीको डिलमा माटो पुर्ने तथा घाट निर्माणमा ठेक्का प्रक्रियामा मिलेमतो गरी सार्वजनिक सम्पत्ति हिनामिना गरेको अभियोगमा उनीहरूमाथि आरोपत्र दायर गरिएको हो।

आर्थिक वर्ष २०७६/७७ का लागि स्वीकृत करसहित ७५ लाख रुपैयाँ लागत अनुमान भएको योजनामा बोलपत्र प्रक्रियामा सबैभन्दा कम कबोल (४२ लाख ७४ हजार ५५१.७१) गर्ने ‘सेट स्क्वायर कन्सट्रक्सन प्रालि’सँग सम्झौता नगरी दोस्रो घटी कबोल (७२ लाख २१ हजार ७३०.७) गर्ने ‘इन्फ्रास्ट्रक्चर एस एन्ड बी बिल्डर्स प्रालि’लाई गैरकानूनी रूपमा ठेक्का दिएको आयोगको ठहर छ।

आयोगको अनुसन्धानमा नगरपालिकाका पदाधिकारीहरूले सेट स्क्वायर कन्सट्रक्सनले पेश गरेका कागजात तथा बैंक जमानत बदनियतपूर्वक लुकाइ नष्ट गराई सम्झौता नदिन निर्णय गराएको र उल्टै उक्त फर्मको विड बोन्ड जफत गरी दोस्रो प्रस्ताव दातासँग सम्झौता प्रक्रियामा अघि बढाएको पाइएको छ।

विसं २०७७ जेठ २१ गते इन्फ्रास्ट्रक्चर एस एन्ड बी बिल्डर्स प्रालिसँग ७२ लाख १८ हजार ६८० रुपैयाँको दरले सम्झौता गरी भुक्तानीसमेत दिइएको र यसरी गरिएको ठेक्का हेरफेरबाट २९ लाख ४४ हजार १३७.२९ रुपैयाँ बराबरको सरकारी धन हिनामिना भएको आयोगले निष्कर्ष निकालेको छ।

आरोपपत्रमा गोइतसहित कार्यपालिका सदस्य धनेश्वर यादव, धर्मनाथ मण्डल, पल्टु कवारी, विनोद राम, समसुल मिया मोमिन, निमित्त प्रमुख प्रशासकीय अधिकृत वीरेन्द्रकुमार सढान, लेखापाल सञ्जिवकुमार महतो, जिन्सी शाखा प्रमुख जुगलकिशोर यादव तथा ठेक्का पाउने कम्पनीका अध्यक्ष सन्तोषकुमार यादवसमेतलाई भ्रष्टाचार निवारण ऐन, २०५९ अनुसार सजायको मागसहित प्रतिवादी बनाइएको आयोगका प्रवक्ता पौडेलले जनाकारी दिए।