ललिता निवास प्रकरण: प्रमाण नपुगेकाको हकमा अनुसन्धान गर्ने बाटो खुल्लै

काठमाडौँ– ललिता निवास जग्गा प्रकरणमा प्रमाण नपुगेकाहरूको हकमा थप अनुसन्धान गर्ने बाटो खुल्ला राखिएको छ। 

जिल्ला सरकारी वकिलको कार्यालय, काठमाडौँले प्रमाण नपुगेर प्रतिवादी नबनाइएकाको हकमा प्रमाण पुगेमा पछि अभियोगपत्र दायर गर्ने गरी बाटो खुल्ला राखेको हो।

जिल्ला न्यायाधिवक्ता महेश खत्रीले प्रमाण नपुगेकाको हकमा पछि प्रमाण पुगेपछि मुद्दा चलाउने गरी अनुसन्धान गर्ने बाटो खुल्लै राखिएको जानकारी दिए।

उक्त प्रकरणमा जिल्ला सरकारी वकिलको कार्यालयले २९० जनालाई प्रतिवादी बनाएर किर्ते मुद्दा दायर गरेको छ।

प्रहरीको केन्द्रीय अनुसन्धान ब्युरोले संगठित अपराध र किर्तेमा ५७ दिन अनुसन्धान गरेर जिल्ला सरकारी वकिलको कार्यालयले अनुसन्धान प्रतिवेदन बुझाएको थियो।