राहुल गान्धीको पुनरावेदन खारेज

गुजरात उच्च अदालतले कांग्रेस नेता राहुल गान्धीको पुनरावेदन निवेदन खारेज गरेको छ।

मोदी थर भएकाहरूको मानहानि हुनेगरी अभिव्यक्ति दिएका भन्दै उनीविरुद्ध मुद्दा परेको थियो। नेता गान्धीलाई तल्लो अदालतले दोषी ठहर गर्दै दुई वर्ष जेल सजाय सुनाएपछि त्यसविरुद्ध उनले उच्च अदालतमा पुनरावेदन गरेका थिए।

उच्च अदालतका न्यायाधीश हेमन्त एम प्रचकको इजलासले तल्लो अदालतले गरेको निर्णयलाई सदर गर्दै गान्धीको पुनरावेदन निवेदन खारेज गरिएको छ।

न्यायाधीश प्रचकले ‘ट्रायल कोर्टको फैसला उचित भएकाले त्यसमा हस्तक्षेप गर्न आवश्यक नभएको’ बताएका छन्। नेता गान्धीविरुद्ध कम्तीमा १० वटा आपराधिक मुद्दा विचाराधीन छन्। ट्रायल कोर्टको फैसलासँगै नेता गान्धीको सांसद पद पनि खारेज भएको थियो।