यूएईले नेपाललाई दियो ११८ रनको लक्ष्य

काठमाडौँ– एसीसी प्रिमियर कपको उपाधिका लागि यूएईले नेपाललाई ११८ रनको लक्ष्य दिएको छ।

कीर्तिपुरस्थित त्रिवि क्रिकेट मैदानमा सोमबार वर्षाका कारण नेपाल र यूएईबीचको खेल २७.३ ओभरमा रोकिएको थियो। टस हारेर पहिले ब्याटिङ थालेको यूएईले वर्षा शुरू हुनुभन्दा अगाडि ९ विकेट गुमाएर १०७ रन बनाएको थियो।

मंगलबार यूएईले सोमबारकै स्थिति (१०६/९–२७.३ ओभर)देखि खेल शुरू गरेको हो। तर, यूएई ३३.१ ओभरमा सबै विकेट गुमाउँदै ११७ रनमा अलआउट भयो।

यूएईका कार्तिक मायाप्पन २३ बल खेल्दै १ रन बनाएर अविजित रहे। यता, जुनैद सिद्दिकीले १७ बलमा १ छक्कासहित १० रन बनाए।

यूएईका आसिफ खानले सर्वाधिक ४६ रन बनाए। उनले ५४ बलमा ७ चौका र १ छक्का प्रहार गरे। ओपनर आर्यन लाक्राले १३, अर्का ओपनर तथा कप्तान मोहम्मद वासिमले ११ र बसिल हाम्मेदले १० रन बनाए। अन्य ब्याटरले दोहोरो अंकमा रन बटुल्न सकेनन्। 

नेपालका ललितनारायण राजवंशीले सर्वाधिक ४ विकेट लिए। उनले ७.१ ओभर बलिङ गर्दै २ मेडनसहित १४ रन दिए।

करण केसी र सन्दीप लामिछानेले २/२ विकेट लिए। सोमपाल कामी र गुलशन झाको नाममा १/१ विकेट रह्यो।