साझा संघर्षबाट आर्थिक र सामाजिक परिवर्तन गर्ने प्रधानमन्त्रीको प्रतिबद्धता

काठमाडौँ– प्रधानमन्त्री पुष्पकमल दाहाल ‘प्रचण्ड’ ले नयाँ वर्षमा विश्वास, आशा र साहसका साथ राष्ट्रका कमजोरी नभई राष्ट्रका क्षमता उजागर गर्ने बताएका छन्।

नयाँ वर्ष २०८० को अवसरमा शुभकामना व्यक्त गर्दै प्रधानमन्त्री दाहालले भनेका छन्, “संकल्प गरौँ, सिंगो राष्ट्रको साझा संघर्ष र संकल्पबाट यो वर्ष केवल क्यालेन्डर परिवर्तन गर्ने छैनौँ, राष्ट्रको आर्थिक र सामाजिक जीवनमा पनि रचनात्मक परिवर्तन ल्याउनेछौँ।” 

परम्परागत प्रकृतिको विकासको मोडेल र योजना तर्जुमा प्रक्रियामा क्रमभंग गर्ने उनको भनाइ छ। “बैंक ब्याजदर कम हुँदै गएको छ। बैंक ब्याजसम्बन्धी चिन्तालाई सम्बोधन गर्न सकारात्मक छलफल भइरहेको छ,”  प्रधानमन्त्री दाहालले भनेका छन्, “राजश्व संकलनमा वृद्धि भइरहेको छ। तर, हाम्रै पुस्ता र नयाँ पिँढीको गुणस्तरीय भविष्यका लागि हामीले अझै धेरै मेहनत गर्नुछ।”

उनले नयाँ वर्षलाई सहमति र सहकार्यमार्फत समृद्ध नेपालको आधार निर्माण गर्ने वर्षका रूपमा मनाउन आम जनसमुदायमा अपिल गरेका छन्। अर्थतन्त्रमा देखिएका संकट र चुनौती क्रमशः कम हुँदै गएको  प्रधानमन्त्री दाहालको भनाइ छ।

“मेरा केही ठोस संकल्प छन्। वैदेशिक रोजगार व्यवस्थित हुँदै गएको छ। श्रमिकको अधिकार सुरक्षित गर्न महत्त्वपूर्ण सामाजिक सुरक्षा अभियानमा उनीहरू जोडिएका छन्। नागरिकले प्राप्त गर्ने सेवा झन्झटमुक्त बनाउने अभियान शुरू भएको छ,” उनले भनेका छन्।

राष्ट्रले आफूलाई दिएको भूमिकामाथि आभार प्रकट गर्दै प्रधानमन्त्रीका रूपमा समस्त नेपाली जनसमुदायसँग नयाँ वर्षका हरेक दिन र हरेक क्षण संविधानको कार्यान्वयन, गणतन्त्रको सुदृढीकरण, स्थिरता र समृद्धिका लागि समर्पित हुने प्रतिबद्धता व्यक्त गरे।

२०८० साललाई राष्ट्रिय उपलब्धिको ऐतिहासिक वर्ष बनाउने प्रधानमन्त्री दाहालको प्रण छ।