स्ववियु निर्वाचन तत्काल अघि बढाउन १७ क्याम्पसलाई त्रिविको निर्देशन

काठमाडौँ– त्रिभुवन विश्वविद्यालयले स्वतन्त्र विद्यार्थी युनियन (स्ववियु) निर्वाचन नभएका १७ आंगिक क्याम्पसलाई तत्काल निर्वाचन प्रक्रिया अगाडि बढाउन निर्देशन दिएको छ।

स्ववियु निर्वाचन केन्द्रीय अनुगमन तथा समन्वय समितिका सदस्य सचिव पशुपति अधिकारीले उक्त क्याम्पसका प्रमुखलाई पत्र लेख्दै यथाशीघ्र प्रक्रिया अगाडि बढाउन निर्देशन दिएका हुन्।

उनका अनुसार उपत्यकाका सात र उपत्यका बाहिरका १० आंगिक क्याम्पसमा निर्वाचन हुन सकेको छैन। उपत्यकाका अमृत साइन्स क्याम्पस, त्रिचन्द्र बहुमुखी क्याम्पस, पाटन संयुक्त क्याम्पस, विश्वभाषा क्याम्पस, आरआर क्याम्पस, नेपाल कमर्स क्याम्पस र आयुर्वेद क्याम्पसमा निर्वाचन भएको छैन।

यस्तै उपत्यका बाहिरका पृथ्वीनारायण क्याम्पस, पश्चिमाञ्चल इन्जिनियरिङ क्याम्पस, पोखरा वन क्याम्पस, पोखरा नर्सिङ क्याम्पस, ठाकुरराम बहुमुखी क्याम्पस वीरगन्ज, वीरेन्द्र बहुमुखी क्याम्पस चितवन, चितवन इन्जिनियरिङ क्याम्पस, कृषि क्याम्पस चितवन, धवलागिरि बहुमुखी क्याम्पस बागलुङ र सिद्धनाथ साइन्स बहुमुखी क्याम्पसमा विवादका कारण निर्वाचन रोकिएको त्रिविले जनाएको छ।

उपत्यकाका २२ मध्ये १५ वटा आंगिक र उपत्यकाबाहिर ४० मध्ये ३० क्याम्पसमा चैत ५ गते निर्वाचन भएको थियो।