टुंगियो प्रदेश १ को नाम, अब कोशी प्रदेश

काठमाडौँ- प्रदेश १ को नाम कोशी प्रदेश राख्ने प्रस्ताव बहुमतले पारित भएको छ।

बुधबार प्रदेशसभाको दुई तिहाइभन्दा बढी मतले प्रदेशको नाम कोशी पारित गरेको हो।

कोशी प्रदेशको पक्षमा ८२ तथा विपक्षमा ४ मत परेको छ। त्यस्तै, ६ जना भने मतदान प्रक्रियामा अनुपस्थित रहे।

नेकपा एमालेले संसद् सचिवालयमा आज बिहान प्रदेशको नाम कोशी हुनुपर्ने प्रस्ताव दर्ता गरेको थियो। उक्त प्रस्तावको पक्षमा नेपाली कांग्रेस, नेकपा (माओवादी केन्द्र) र राप्रपाले समर्थन गरेका हुन्। 

कोशी प्रदेशको प्रस्तावमाथि नेकपा एकीकृत समाजवादीका नेता राजेन्द्रकुमार राई र कमल जवेगुले ‘किरात लिम्बुवान सगरमाथा’ नामको संशोधन प्रस्ताव दर्ता गरेका थिए। तर संशोधन प्रस्ताव बहुमतले अस्वीकृत भएको थियो।