सहमति नभए बहुमतबाटै प्रदेशको नामकरण हुन्छ : मुख्यमन्त्री कार्की

झापा– प्रदेश–१ का मुख्यमन्त्री हिक्मतकुमार कार्कीले सहमतिबाटै प्रदेशको नामकरण गरिने बताएका छन्।

झापाको विर्तामोडमा शनिबार प्रेस चौतारीले आयोजना गरेको पत्रकार अभिनन्दन तथा सम्मान कार्यक्रममा बोल्दै उनले संसद्मा प्रतिनिधित्व गर्ने सबै राजनीतिक दलहरूको सहमतिबाट नामकरण गर्ने आफ्नो योजना बताए।

“अनुकूल समयमा सकभर छिट्टै प्रदेशको नामकरण गर्छौँ”, उनले भने, “सहमति जुटेन भने बहुमतबाट भए पनि नामकरण हुन्छ।” हाल प्रदेश–१ बाहेकका प्रदेशको नामाकरण भइसकेको छ। 

यसअघि प्रदेश–१ को नामकरण प्रयासमा आफ्नो दल सहयोगी बन्न खोज्दा पनि सफल नबनेको दाबी गर्दै नेकपा एमाले स्थायी कमिटीका सदस्यसमेत रहेका मुख्यमन्त्री कार्कीले भने, “हाम्रा कारणले नामकरण रोकिएको होइन।”

उनले प्रदेश–१ मा पुरानो सञ्चार प्रतिष्ठान ब्यूँताउने जानकारी दिए। मुख्यमन्त्री कार्की प्रदेशको पहिलो सरकारका बेला आन्तरिक मामिला, कानुन तथा सञ्चारमन्त्री थिए। त्यसबेला आफूले नै सञ्चार प्रतिष्ठान गठन गरेको प्रसंग जोड्दै उनले अब कानुन नै बनाएर प्रतिष्ठानलाई अघि बढाउने बताए।

पत्रकार उपचार कोष सञ्चालन र पेसागत सुरक्षाका लागि प्रदेश सरकारले के-कस्तो सहयोग गर्नुपर्छ भनेर चाँडै नै नेपाल पत्रकार महासंघ, प्रेस काउन्सिल र पत्रकारहरूको संघसंगठनसँग परामर्श गर्ने उनले प्रतिबद्धता व्यक्त गरे।