शान्ति योजना स्वीकार गर्न युक्रेनलाई ट्रम्पको नोभेम्बर २७ सम्मको समय

अमेरिकी राष्ट्रपति डोनाल्ड ट्रम्पले रुस–युक्रेन युद्ध अन्त्य गर्न तयार गरिएको २८ सूत्रीय शान्ति योजनामाथि युक्रेनको प्रतिक्रिया प्राप्त गर्नका लागि नोभेम्बर २७ को समयसीमा तोकेका छन्। युक्रेनी राष्ट्रपति भोलोदिमर जेलेन्स्कीले देश अत्यन्त कठिन निर्णयको मोडमा पुगेको र ‘गरिमा गुमाउने वा प्रमुख साझेदार गुमाउने जोखिम’ जस्ता चुनौतीपूर्ण विकल्प सामना गर्नुपर्ने बताएको केही घण्टामै ट्रम्पले यस्तो कदम चालेका हुन्।

शुक्रबार फक्स न्युज रेडियोसँगको अन्तर्वार्तामा राष्ट्रपति ट्रम्पले वार्तामा सार्थक प्रगति देखिए मात्र समयसीमा केही लचिलो हुन सक्ने सम्भावना रहेको बताए। “मेरा अधिकांश विषयमा समयसीमा तोकिएको हुन्छ र काम सकारात्मक रूपमा अघि बढेको खण्डमा यसलाई विस्तार गर्न सकिन्छ,” उनले भने, “तर, नोभेम्बर २७ हामीलाई उपयुक्त समय जस्तो लागेको छ।”

ट्रम्पले प्रभावकारी रूपमा राष्ट्रपति जेलेन्स्कीलाई पाँच दिनभित्र निर्णय गर्न बाध्य पारिएको संकेत पनि गरे। उनका अनुसार, युक्रेन ‘आफ्नो गरिमा बचाउने कि प्रमुख सहयोगीको समर्थन गुमाउने’ भन्ने कठोर विकल्पबीच छ। यस अतिरिक्त, उनले चेतावनी दिँदै युक्रेनले आफ्नो केही भूभाग तत्काल गुमाउने सम्भावना अझै कायम रहेको प्रस्ट पारे।

यसैबीच, अमेरिकी उपराष्ट्रपति जेडी भान्ससँगको फोन वार्तापछि राष्ट्रपति जेलेन्स्कीले सामाजिक सञ्जाल एक्समार्फत किभ अमेरिकी तथा युरोपेली पक्षसँग राष्ट्रिय सुरक्षा सल्लाहकार तहमा सहकार्य गर्दै शान्तिको मार्ग खोज्न सहमत भएको जानकारी गराएका छन्।

यसअघि टेलिभिजनमार्फत राष्ट्रलाई सम्बोधन गर्दै राष्ट्रपति जेलेन्स्कीले देश ‘संकटको नयाँ चरण’मा प्रवेश गरिरहेको उल्लेख गर्दै अत्यन्त कठिन विकल्पसहितको जटिल परिस्थितिको चेतावनी दिएका थिए। “युक्रेन अब अत्यन्तै चुनौतीपूर्ण निर्णयको घडीमा छ—या त गरिमा गुमाउने जोखिम वा प्रमुख साझेदार गुमाउने भय। या त २८बुँदे कठोर प्रस्ताव स्वीकार्ने, वा अर्को कठोर जाडो सहने,” उनले भने।

ओभल अफिसमा पत्रकारहरूसँग कुरा गर्दै राष्ट्रपति ट्रम्पले शान्तिको यथार्थवादी बाटो पहिचान भइसकेको दाबी गर्दै यो योजनामा अघि बढाउन जेलेन्स्कीको स्वीकृति अनिवार्य हुने पुनः स्पष्ट पारे। सीएनएनले उद्धृत गरेअनुसार ट्रम्पले भने, “हामीसँग शान्ति हासिल गर्ने बाटो छ भन्नेमा विश्वास छ, तर युक्रेनी पक्षले यसलाई अनुमोदन गर्नुपर्छ। उनीहरू (स्वीकृति दिन) नजिकै आइरहेका छन् जस्तो लाग्छ, तर म अहिले नै भविष्यवाणी गर्न चाहन्नँ।”

ट्रम्पद्वारा पुनरावलोकन भई समर्थन प्राप्त २८बुँदे शान्ति प्रस्ताव वासिङ्टनले गत तीन वर्षदेखि अवरुद्ध भइरहेको शान्ति प्रक्रियालाई पुनर्जीवित गर्ने उद्देश्यले अघि सारेको पछिल्लो पहल हो। यसअघि रुसले पूर्ण कब्जा नजमाएका क्षेत्रमा क्षेत्रीय छुट दिनुपर्ने जस्ता केही प्रस्ताव किभले अस्वीकार गरिदिएको थियो।

यता, रुसी राष्ट्रपति भ्लादिमिर पुटिनले शुक्रबार अमेरिकी योजनाबारे टिप्पणी गर्दै उक्त प्रस्ताव आफूले अलास्कामा ट्रम्पसँग भएको भेटमा छलफल गरेको पुरानो प्रारूपकै परिमार्जित संस्करण जस्तो देखिएको बताए। सुरक्षा परिषद्को बैठकमा उनले भने, “अमेरिकी पक्षले केही सम्झौतामा सहमत हुन आग्रह गरेको थियो।”

पुटिनका अनुसार मस्कोले एन्कोरेजमा प्रस्तुत गरिएका पहल स्वीकार गरेको थियो, तर किभले प्रस्ताव अस्वीकार गरेपछि प्रक्रिया रोकिएको थियो।

रुसी पक्षले अद्यावधिक २८बुँदे प्रस्तावको पाठ प्राप्त गरेको र त्यसलाई ‘विस्तृत रूपमा’ अध्ययन गर्न बाँकी रहेको समेत पुटिनले खुलासा गरे। “मलाई विश्वास छ, यसले अन्तिम शान्ति सम्झौताको आधार बन्न सक्छ,”  पुटिनले भने।