ग्रामीण सडक सञ्चालनमा आएपछि तिहारमा गाउँलेलाई सहज

ढोरपाटन– बागलुङका ग्रामीण सडक सञ्चालनमा आएपछि तिहारका बेला सर्वसाधारणलाई आवतजावत गर्न सहज भएको छ। बर्खाका कारण झन्डै चार महिनादेखि अवरुद्ध सडक अहिले आएर सञ्चालनमा आएका हुन्। 

दशैँमा खुल्नु पर्ने भए पनि लामो वर्षा हुँदा सडक थप बाढीपहिरोले अवरुद्ध भएका थिए। तिहार नजिकिएसँगै ग्रामीण सडक खुलेपछि स्थानीयलाई यात्रा गर्न र सामान ढुवानी गर्न सहज भएको छ। दशैँमा बोकेरै बजारदेखि सामान गाउँ पुर्‍याएका स्थानीयले सडक खुलेपछि गाडीमा ढुवानी गर्न थालेका छन्।

असार दोस्रो सातादेखि बन्द भएका सडक खुलेपछि यात्रा गर्न र सामान ढुवानीमा सहज भएको निसीखोला गाउँपालिका–१ का कर्णबहादुर सुनारले बताए। साउनमा पहिरोले सडक पुरिएपछि गाउँलेले पैदल हिँड्न र बोकेर सामान ल्याउन बाध्य भएका थिए। “यो वर्ष गाउँको बाटो ठाउँ–ठाउँमा पहिरोले पुरियो, दशैँमा खुल्नु पर्ने खुलेन, अहिले तिहार शुरू नहुँदै खुल्यो, दशैँमा त बजारबाट नुन, तेल र चामल बोकेर ल्यायौँ, तिहारमा चाहीँ गाडीले नै ल्याउने भयो,” उनले भने।

जिल्लाको सबैभन्दा विकट गाउँ नजाखानी, भत्रिवन र पात्ले जोड्ने सडक पनि सञ्चालनमा आएका छन्। तमानखोला गाउँपालिकाले केही दिन अगाडि मेसिन लगाएर सडकको पहिरो पन्छाएपछि सञ्चालनमा आएका हुन्। 

नर्जा खोलामा पानीको बहाव बढी हुँदा दशैँमा सवारीसाधन चल्न नसकेको स्थानीय बिमल छन्त्यालले बताए। अहिले खोलामा पानीको बहाव कम भएपछि गाडी चल्न थालेको छ। तमानखोला गाउँपालिकाका अध्यक्ष जोकलाल बुढा मगरले दशैँ अगावै सबै सडक खुलाउने प्रयास गरे पनि वर्षाका कारण नसकेकामा अहिले सबै सडक खुलाएको बताए। 

गाउँपालिकाको केन्द्र बोंगादोभानदेखि तमान, लम्मेला हुँदै म्याग्दी जोड्ने सडक भने खुंखानीखोलामा पानीको बहाव नघट्दा गाडी चल्न सक्ने अवस्था नरहेको उनको भनाइ छ। तर तमान लाम्मेलासम्म ढोरपाटनको खुंखा हुँदै सवारी साधान चल्ने अध्यक्ष बुढा मगरले बताए। 

निसीखोला गाउँपालिकाले पनि वडा नम्बर १ देखि ७ सम्मका अधिकांश सडक खुलाएको गाउँपालिकाले जनाएको छ। केही सडक खुलाउने क्रममै रहेको हुँदा तिहारसम्म खुलाई सक्ने गाउँपालिका अध्यक्ष सूर्यबहादुर घर्ती मगरले जानकारी दिए।