आन्दोलनका घाइतेले प्रधानमन्त्रीसँग भने– ‘हाम्रो योगदान खेर नजाओस्’

'जेनजी' आन्दोलनमा घाइते भएका युवाहरूले प्रधानमन्त्री सुशीला कार्कीसँग देशका लागि आफूहरूले दिएको बलिदान खेर जान नदिन र देशलाई निकास दिन आग्रह गरेका छन्।

रासस

शनिबार, २८ भदौ, २०८२

आन्दोलनका घाइतेले प्रधानमन्त्रीसँग भने– ‘हाम्रो योगदान खेर नजाओस्’

काठमाडौँ– प्रधानमन्त्री सुशीला कार्कीले ‘जेनजी’ आन्दोलनमा घाइते भई मीनभवनस्थित निजामती अस्पतालमा उपचाररत युवालाई भेटेर उहाँहरूको स्वास्थ्य अवस्थाबारे जानकारी लिएकी छन्। 

प्रधानमन्त्री कार्कीले शनिबार अपराह्न उक्त अस्पतालमा उपचाररत घाइतेहरूको स्वास्थ्य अवस्थाबारे जानकारी लिनुभएको अस्पतालका कार्यकारी निर्देशक प्राडा. मोहनचन्द्र रेग्मीले राससलाई जानकारी दिए।

“प्रधानमन्त्रीले घाइतेको स्वास्थ्यस्थितिबारे जानकारी लिनुभयो। त्यसक्रममा उहाँहरूले आफ्नो स्वास्थ्यबारे प्रधानमन्त्रीलाई जानकारी गराउँदै आफूले देशका लागि दिएको बलिदान खेर नजाओस्, प्रधानमन्त्रीले देशलाई निकास दिनुपर्छ। पुनः अर्को पुस्ताले आन्दोलन गर्नु नपरोस्,” डा रेग्मीले भने। 

प्रधानमन्त्री कार्कीले मुलुकको अवस्था परिवर्तन गर्न हरसम्भव प्रयत्न गर्ने प्रतिबद्धता व्यक्त गरेकी थिइन्।

कार्यकारी निर्देशक रेग्मीका अनुसार गत सोमबार यता ४५७ घाइते अस्पताल पुगेकामा ४४ जनालाई अन्यत्र ‘रेफर’ गरिएको थियो। ३६४ जना उपचारपछि घर फर्किसकेका छन्।

अस्पताल भर्ना भएका ४९ मध्ये ११ जना हाल उपचाररत छन्। गम्भीर घाइते एक जनाको सघन उपचार कक्षमा उपचार भइरहेको छ भने ४५ जनाको शल्यक्रिया तथा सात जनाको पुनः शल्यक्रिया गरिएको छ। निजामती अस्पतालमा उपचारका क्रममा ६ जनाको मृत्यु भएको थियो।

प्रतिक्रिया दिनुहोस !