सी चिनफिङले मोदीलाई भने– ड्र्यागन र हात्ती एकजुट हुनुपर्छ

चिनियाँ राष्ट्रपति सी चिनफिङले आइतबार भारतीय प्रधानमन्त्री नरेन्द्र मोदीसँग भएको प्रतिनिधिमण्डल स्तरको वार्तामा आफ्नो प्रारम्भिक टिप्पणीमा चीन र भारत मित्र हुनु र ‘ड्र्यागन र हात्ती’ एकजुट हुनु महत्त्वपूर्ण रहेको बताएका छन्।

संसार जटिल र अस्थिर अवस्थाबाट गुज्रिरहेको उल्लेख गर्दै सीले चीन र भारत दुवैका लागि दुई प्राचीन सभ्यता तथा दुई सबैभन्दा बढी जनसंख्या भएका मुलुक एकजुट हुनु आवश्यक रहेको बताए। विश्वव्यापी दक्षिणका सदस्यहरू मित्र र असल छिमेकी बन्नु, एकअर्काको सफलतालाई सक्षम पार्नु र ड्र्यागन र हात्ती सँगै नाच्नु नै सही छनोट हुने उनको भनाइ थियो।

“ग्लोबल साउथका महत्त्वपूर्ण सदस्यका रूपमा दुवैले जनताको हित सुधार्ने, विकासोन्मुख मुलुकहरूको एकता बढाउने र मानव समाजको प्रगतिलाई अघि बढाउने ऐतिहासिक जिम्मेवारी बोकेका छन्। असल छिमेकी र सौहार्दपूर्ण साथी, एकअर्काको सफलतालाई सक्षम बनाउने साझेदार र ड्र्यागन र हात्तीलाई सँगै नचाउन दिनु नै सही निर्णय हो,” राष्ट्रपति सीले भने।

साथै उनले प्रधानमन्त्री मोदीलाई फेरि भेट्न पाउनु र सांघाई सहयोग संगठन (एससीओ)को तियानजिन शिखर सम्मेलनमा चीनमा स्वागत गर्न पाउँदा मलाई खुशी लागेको बताए।

प्रधानमन्त्री मोदीसँगको द्विपक्षीय बैठकमा उनले भने, “गत वर्ष हामीले कजानमा सफल भेटवार्ता गर्यौँ, जसले चीन–भारत सम्बन्धलाई नयाँ शुरूआत दियो। हामीले सहमत भएका महत्त्वपूर्ण बुँदाहरूलाई दुवै पक्षले कार्यान्वयन गरेका छन् र द्विपक्षीय आदानप्रदान तथा सहयोगले प्रगति गरेको छ।”

सीले यस वर्ष चीन–भारत कूटनीतिक सम्बन्धको ७५औँ वार्षिकोत्सव भएको स्मरण गर्दै दुवै पक्षले सम्बन्धलाई रणनीतिक उचाइ र दीर्घकालीन दृष्टिकोणबाट हेर्नु आवश्यक रहेको बताए।