भरतपुर आँखा अस्पतालमा उपचार गर्न आउनेमध्ये ९० प्रतिशत भारतीय बिरामी

चितवन– नेपाल नेत्रज्योति संघ चितवनले ठोरीमा सञ्चालन गरेको भरतपुर आँखा अस्पताल ठोरीमा ९० प्रतिशत बिरामी भारतीय हुने गरेका छन्। भारतीय सीमाबाट १०० किलोमिटर टाढादेखि आँखा उपचारका लागि त्यहाँ बिरामी आउने गरेका हुन्।

भरतपुर आँखा अस्पताल ठोरीका इन्चार्ज अंकीत श्रीवास्तवका अनुसार गत आर्थिक वर्षमा बहिरंग सेवामा १६ हजार २८४ जनाले आँखाको उपचार गरेकामध्ये १४ हजार १८ जना भारतीय नागरिक थिए। गत वर्ष ८३९ जनाको आँखाको शल्यक्रिया गरिएको थियो। अघिल्लो आर्थिक वर्षमा १५ हजार जनाले सेवा लिएका थिए।

अस्पतालमा विशेष गरी भारतको पश्चिमी चम्पारणबाट बिरामी आउने गरेको उनले जानकारी दिए। सो क्षेत्रका बिरामीले नजिक, सहज र सस्तो उपचार ठोरीमा पाउने गरेका छन्। भरतपुर आँखा अस्पताल सञ्चालक समितिका कार्यवाहक अध्यक्ष तेजेन्द्र खड्काले बहिरंग (ओपीडी) सेवा लिनेले ८० रुपैयाँको टिकटमा परीक्षण गर्न पाएको बताए।

भारतीय क्षेत्रका बिरामी अधिकांश मोतियाबिन्दु र आँखाको नानीको चोटपटकको समस्या लिएर आउने गर्दछन्। ती बिरामीको आवश्यकताअनुसार शल्यक्रिया गर्नुपर्दा कम शुल्कमा उच्चस्तरको उपचार हुने भएकाले भारतीय बिरामीसमेत बढ्दो क्रममा रहेको उनको भनाइ छ। भारतीय क्षेत्रका ती बिरामीले नेपालको ठोरीमा उपचार नपाउँदा गोरखपुर पुग्नुपर्ने हुन्छ। भरतपुर आँखा अस्पतालले दाताकोसमेत सहयोग पाउने हुँदा कम शुल्कमा उपचार सेवा दिन सकेको खड्काले बताए।

कतिपय बिरामीलाई थप सेवा दिनुपर्दा भरतपुर आँखा अस्पताल ल्याएर उपचार गर्ने गरिएको छ। कतिपय समयमा भरतपुरबाट विभिन्न विषयका विज्ञ चिकित्सक गएर ठोरीमा नै पनि उपचार गर्ने गरिएको छ। भरतपुर आँखा अस्पतालले विभिन्न जिल्लाका २५ ठाउँबाट सेवा दिँदै आएको छ।