देशका केही भागमा भारी वर्षाको सम्भावना

काठमाडौँ– मौसम पूर्वानुमान महाशाखाका अनुसार देशभर मनसुनी वायुको प्रभाव रहेको छ। 

मनसुनको न्यूनचापीय रेखा सरदर स्थान उत्तरतर्फ नेपालको तराईमा अवस्थित छ। यसको प्रभावले कर्णाली र सुदूरपश्चिमलगायत पहाडी भूभागमा अधिकांश बदली रही बाँकी भूभागमा साधरणतया बदली रहेको छ। 

मधेशका एक–दुई तथा बाँकी प्रदेशका थोरै स्थानमा मध्यम वर्षा भइरहेको छ। दिउँसो कोशी, लुम्बिनी, कर्णाली र सुदूरपश्चिमका पहाडी भूभागमा बदली रही बाँकी स्थानमा साधरणतया बदली रहनेछ। 

लुम्बिनी, कर्णाली, सुदूरपश्चिम र कोशीको पहाडी तथा बाँकी भूभागका थोरै स्थानमा मध्यम वर्षाको सम्भावना छ। कोशी र सुदूरपश्चिमका एक–दुई स्थानमा भारी वर्षाको पनि सम्भावना रहेको छ।

राति देशभर साधरणतया बदली रहनेछ। कोशी र मधेशका केही तथा बागमती, गण्डकी र सुदूरपश्चिमका थोरै स्थानमा मध्यम वर्षाको सम्भावना छ। कोशीको एक–दुई स्थानमा भारी वर्षाको पनि सम्भावना रहेको छ। 

देशभर मनसुन सक्रिय रही कोशी र सुदूरपश्चिममा भारी वर्षाको पनि सम्भावना रहेकाले सतर्कता अपनाउन महाशाखाले अनुरोध गरेको छ।