आरतीका आमाबुबालाई माइतीघरबाट हटाएको विरोधमा प्रदर्शन

आरती साहको न्यायका लागि बृहत् नागरिक आन्दोलनले विरोध प्रदर्शन गरेको छ। आरतीको न्यायका लागि माइतीपक्ष १२१ दिनदेखि माइतीघर मण्डलमा धर्नारत थिए, तर आरती साहको आमाबुवा र भाइलाई शनिबार प्रहरीले बल प्रयोग गरी हटाएको थियो। प्रहरीले ब्यानरसमेत च्यातेर धरपकड गर्दै धर्नास्थलबाटै उनीहरूलाई हिरासतमा लिइएको विरोधमा बृहत् नागरिक आन्दोलनले आइतबार माइतीघरमा विरोध प्रदर्शन गरेको हो। बृहत् नागरिक आन्दोलनका अभियन्ताहरूले ‘आरती साहलाई न्याय दे’, ‘सरकार दण्डहीनता अन्त्य गर’, ‘म पनि यही देशको नागरिक हो सरकार’, ‘न्याय नपाए कहाँ जाने?’ लगायतका नारा लेखिएका प्लेकार्ड बोकेर विरोध प्रदर्शन गरेका थिए। विरोध प्रदर्शनमा बृहत् नागरिक आन्दोलनका अभियन्ता सञ्जीव उप्रेती, नवीन तिवारी, आरतीकी बहिनी मनिषा साहलगायत उपस्थित थिए।

उकालो