इजरायल र इरान युद्धविराम गर्न सहमत भएको ट्रम्पको दाबी

अमेरिकाका राष्ट्रपति डोनाल्ड ट्रम्पले इजरायल र इरान युद्ध अन्त्य गर्न सहमत भएको दाबी गरेका छन्। दुवै देशले सोमबार युद्धविराममा सहमति गरेका हुन्। युद्धविराम केही घण्टाभित्र लागू हुने उनले जनाएका छन्। 

ट्रम्पका अनुसार इरानले युद्धविराम शुरू गर्नेछ भने त्यसको १२ घण्टापछि इजरायल त्यसमा सहभागी हुनेछ। त्यसपछि २४ घण्टाको समयावधिमा दुवै पक्षले युद्धको औपचारिक अन्त्यको घोषणा गर्नेछन्।

राष्ट्रपति ट्रम्पले दुवै राष्ट्रले धैर्य, साहस र समझदारी देखाएकोमा बधाई दिँदै, यस सहमतिले दीर्घकालीन विनाशबाट सम्पूर्ण मध्यपूर्व क्षेत्रलाई बचाउन सक्ने विश्वास व्यक्त गरेका छन्। 

“ईश्वरले इजरायललाई आशीर्वाद दिनुहोस्, ईश्वरले इरानलाई आशीर्वाद दिनुहोस्, ईश्वरले मध्यपूर्व, संयुक्त राज्य अमेरिका तथा समग्र विश्वलाई पनि आशीर्वाद दिनुहोस्,” ट्रम्पले सामाजिक सञ्जालमार्फत भनेका छन्।

तर, हालसम्म यसबारे इजरायल र इरानबाट कुनै आधिकारिक प्रतिक्रिया आएको छैन। अमेरिकी राष्ट्रपतिको कार्यालय र रक्षा मन्त्रालयबाट पनि यसबारेमा औपचारिक धारणा सार्वजनिक गरिएको छैन।