युक्रेनी ड्रोन हमलाले मस्को विमानस्थलमा हवाई उडान अवरुद्ध

रुसको राजधानीलक्षित युक्रेनी ड्रोन आक्रमणपछि बिहीबार मस्को वरपरको हवाई उडान अवरुद्ध भएको छ। साथै, रातभरमा शहरलाई लक्षित ३५ युक्रेनी ड्रोन खसालिएको रक्षा मन्त्रालयले बताएको छ।

“हवाई रक्षा प्रणालीले १०५ युक्रेनी ड्रोन नष्ट र रोक्यो, तीमध्ये ३५ मस्कोतर्फ गइरहेका थिए”, मन्त्रालयले एक विज्ञप्तिमा भनेको छ। 

मस्कोका मेयर सर्गेइ सोब्यानिनले टेलिग्राम पोस्टमा भनेका छन्, “आपत्कालीन सेवा विशेषज्ञहरूले ड्रोनका भग्नावशेष खसेका ठाउँमा काम गरिरहेका छन्।”

मेयरका अनुसार शहरतर्फ २७ वटा ड्रोन प्रहार गरिएको एक दिनपछि र रुसले सप्ताहान्तमा युक्रेनविरुद्ध रेकर्ड संख्यामा ड्रोन तैनाथ गरेपछि आक्रमण भएको हो।

तीन वर्षअघि रुसले युक्रेनमा सैन्य आक्रमण शुरू गरेदेखि दुई देशले लगभग दैनिकजसो एक अर्काविरुद्ध ड्रोन तैनाथ गरिरहेका छन्, तर मस्कोलाई विरलै लक्षित गर्ने गरिएको छ।

बिहीबार मस्कोका धेरैजसो विमानस्थलमा उडान अवरुद्ध भएको संघीय हवाई यातायात एजेन्सी रोसाभियाट्सियाले जनाएको छ।

विमान अस्थायी रूपमा शहरको मुख्य शेरेमेत्येवो विमानस्थलका साथै अन्य विमानस्थलमा ग्राउन्डेड गरिएको थियो। रुसी राष्ट्रपति भ्लादिमिर पुटिनले बारम्बार किभ र पश्चिमको बिना शर्त र तत्काल युद्धविरामको आह्वानलाई अस्वीकार गरिरहेका छन्।

रुसले अहिले क्रिमिया प्रायद्वीपसहित युक्रेनी भूभाग नियन्त्रणमा लिएको छ। क्रिमियालाई उसले सन् २०१४ मा कब्जा गरेको थियो। यो लडाइँले दशौँ हजारको ज्यान लिएको छ, लाखौँलाई आफ्नो घर छोड्न बाध्य पारेको छ र युक्रेनको पूर्व र दक्षिणका शहर र गाउँहरू ध्वस्त भएका छन्।