विद्युत् आपूर्तिमा देखिएको समस्या समाधान गर्न सांसदरूको माग

काठमाडौँ– सांसदहरूले समय–समयमा विद्युत् आपूर्ति बन्द हुनुका कारणबारे सरकारको ध्यानाकर्षण गराएका छन्। प्रतिनिधिसभाको आइतबार बसेको बैठकमा उनीहरूले विद्युत् आपूर्तिमा देखिएको समस्या तत्काल समाधान गरी नियमित आपूर्तिका लागि सरकारसँग माग गरेका हुन्। 

राष्ट्रिय स्वतन्त्र पार्टीका सांसद शिव नेपालीले विद्युत् आपूर्तिमा भएको समस्या तत्काल समाधान गर्न माग गरे। “अहिले घरघरमा अँध्यारो भइरहेको हुन्छ, बत्ती झ्यापझ्याप गइरहेको छ, यसका कारणबारे जानकारी गराइ यथाशीघ्र समस्या समाधान गर्न आग्रह गर्छु,” उनले भने।

नेकपा माओवादी केन्द्रका सांसद सूर्यमान तामाङ (दोङ) ले विद्युत् प्राधिकरणको लापरबाहीका कारण विद्युत्‌का क्षेत्रमा काम गर्ने कामदारको अनाहकमा मृत्यु भइरहेको उल्लेख गर्दै सरकारको ध्यानाकर्षण गराए। नियमित विद्युत् आपूर्तिका लागि उनले ऊर्जा मन्त्रालय र विद्युत् प्राधिकरणको ध्यानाकर्षण गराए। हिजोका दिन लोडसेडिङ अन्त्य भएको थियो। पछिल्लो समय लोडसेडिङ भए जसरी झ्यापझ्याप बत्ती जान्छ। के अब नेपाली जनता अँध्यारोमा बस्नुपर्ने अवस्था आएको हो?,” उनले प्रश्न गरे। 

नेकपा एमालेका सांसद सराज अहमद फारुकीले पछिल्लो समय सडक दुर्घटनाका घटना बढ्दै गएका उल्लेख गर्दै दुर्घटना न्यूनीकरणसम्बन्धी योजना ल्याउन सरकारको ध्यानाकर्षण गराए। राष्ट्रिय प्रजातन्त्र पार्टीका ज्ञानेन्द्र शाहीले काभ्रेपलान्चोकमा विद्युत् जडानका क्रममा उमेश परियारको करेन्ट लागेर मृत्यु भएको घटनाप्रति सरकारको ध्यानाकर्षण गराए। 

जनमत पार्टीका सांसद अब्दुल खाँनले यही शनिबार सर्लाहीको पर्सा–५ तसलिम अन्सारीलाई केही व्यक्तिले मारपिट गरी बंगुरको खोरमा थुनेको घटनाको छानबिन गरी दोषीलाई कारबाही गर्न माग गरे। मुस्लिम समुदायको धार्मिक, सांस्कृतिक र पहिचानको संरक्षण गर्न सरकारको ध्यानाकर्षण गराए। 

नेकपा माओवादी केन्द्रका सांसद रणेन्द्र बरालीले केही दिनअघि विद्युत् मर्मतका क्रममा करेन्ट लागेर मृत्यु भएका २८ वर्षीय उमेश परियारको परिवारलाई उचित राहत र क्षतिपूर्ति दिलाउन सरकारको ध्यानाकर्षण गराए।