नेपालसँग बहराइन ९ विकेटले पराजित

काठमाडौँ– थाइल्यान्डमा जारी आईसीसी महिला टी२० विश्वकप एशिया छनोटमा नेपालले बहराइनलाई ९ विकेटले पराजित गरेको छ। 

वर्षाका कारण ५ ओभरमा झारिएको खेलमा बहराइनले दिएको ४२ रनको लक्ष्य नेपालले ४.२ ओभरमा १ विकेट गुमाउँदै पूरा गरेको हो। 

टेर्डथाई क्रिकेट मैदानमा नेपालका लागि कविता कुँवरले र सम्झना खड्काले समान १८ र कप्तान इन्दु बर्माले २ रन बनाइन्। 

त्यसअघि बहराइनले कप्तान रसांगिकाको ३४ रनको मद्दतमा ४१ रन बनाएको थियो। नेपालकी पूजा महतोले १ विकेट लिइन्।  

यसअघि नेपाल र हङकङबीचको पहिलो खेल वर्षाका कारण रद्द भएको थियो। 

प्रतियोगितामा आयोजक थाइल्यान्डसहित नेपाल, हङकङ, यूएई, मलेसिया, बहराइन, कतार, भुटान र कुवेत छन्। नेपाल समूह ‘सी’मा छ। उक्त समूहमा हङकङ र बहराइन रहेका छन्।  

लिग चरणपछि हरेक समूहमा शीर्षस्थानमा रहने टोली सुपर तीनमा पुग्ने छन्। त्यसबाट शीर्ष २ टोली ग्लोबल छनोट चरणमा पुग्ने छन्।