नेपाल बारको अध्यक्षमा मिश्र र महासचिवमा कोइराला विजयी

काठमाडौँ– कानून व्यवसायीहरूको छाता संगठन नेपाल बार एसोसिएसनको अध्यक्षमा वरिष्ठ अधिवक्ता प्राडा विजयप्रसाद मिश्र विजयी भएका छन्।

बिहीबार सम्पन्न मतगणनामा मिश्रको प्यानल नै विजयी भएको हो। मतपरिणामअनुसार ५ हजार ५२ मत प्राप्त गर्दै मिश्र अध्यक्षमा निर्वाचित भएका हुन्। उनका प्रतिद्वन्द्वी वरिष्ठ अधिवक्ता रमनकुमार श्रेष्ठले २ हजार ६२१ मत प्राप्त गरे। 

सत्तारुढ नेकपा एमाले र नेपाली कांग्रेस निकट कानून व्यवसायी संगठनले गठबन्धन गरी अध्यक्षमा मिश्रलाई उम्मेदवार बनाएका थिए। श्रेष्ठको नेतृत्वमा नेकपा माओवादी र रास्वपा, नेकपा एकीकृत समाजवादी लगायत दल निकट कानून व्यवसायीका संगठनले प्यानल बनाएका थिए। 

महासचिवमा पनि कांग्रेस-एमाले गठबन्धनकै वरिष्ठ अधिवक्ता केदारप्रसाद कोइराला ४ हजार ८७४ मतका साथ विजयी भए। प्रतिद्वन्द्वी यज्ञमणि न्यौपानेले २ हजार ३६७ मत पाए।

उपाध्यक्षमा कोशीबाट पदमप्रसाद लिम्बु, मधेशबाट अजयशंकर झा, बागमतीबाट तेजबहादुर रावल, गण्डकीबाट भूपेन्द्र खनाल, लुम्बिनीबाट कृष्णप्रसाद पोख्रेल, कर्णालीबाट विवशकुमार बस्नेत र सुदूरपश्चिमबाट सिद्धराज ओझा निर्वाचित भएका छन्।

कोषाध्यक्षमा वरिष्ठ अधिवक्ता जगतबहादुर कार्की निर्वाचित भएको निर्वाचन समितिले जानकारी दिएको छ।