एशियन कप छनोट: नेपाल मलेसियासँग पराजित

काठमाडौँ– एएफसी एशियन कप २०२७ तेस्रो चरणको छनोटअन्तर्गत मंगलबार साँझ भएको खेलमा नेपाल मलेसियासँग पराजित भएको छ। मलेसियाको सुल्तान इब्राहिम स्टेडियममा भएको खेलमा नेपाल मलेसियासँग २-० गोल अन्तरले पराजित भएको हो।

मलेसियाको जितमा हेक्टोर हेभेल र ला’भेरे कोर्बिन ओङले १/१ गोल गरे। नेपालले दुवै हाफमा १/१ गोल बेहोर्‍यो।

सिंगापुरलाई १–० गोल अन्तरले पराजित गर्दै उच्च मनोवलका साथ मलेसिया पुगेको नेपाली टिम पहिलो खेलमै पराजित भएको हो। चैत ७ गते सिंगापुरको नेसनल स्टेडियममा भएको मैत्रीपूर्ण खेलमा जेलेस्पीजंग कार्कीको निर्णायक गोलसँगै नेपालले सिंगापुरलाई ३६ वर्षपछि पराजित गरेको थियो।

नेपाल फिफा वरीयतामा १७५औँ स्थानमा छ भने मलेसिया १३२औँ स्थानमा छ। पुरुष फुटबलमा यसअघि भएका सात भेटमा नेपालले मलेसियालाई पराजित गर्न सकेको थिएन। मलेसियाले ६ खेल जित्दा एक खेल भने बराबरीमा सकिएको थियो।

मंगलबारको खेल नेपालमा हुनुपर्नेमा दशरथ रंगशालालाई अन्तर्राष्ट्रिय मान्यता नदिएको कारण नेपाली टोली मलेसिया गएको हो।