रवि लामिछानेसहित ४ जनाविरुद्ध सम्पत्ति शुद्धीकरण कसुरमा मुद्दा दायर

कास्की जिल्ला अदालतमा पूर्वगृहमन्त्री रवि लामिछानेविरुद्ध २७ करोड तथा छविलाल जोशीविरुद्ध ७४ करोड रुपैयाँ बिगो दाबीसहित सम्पत्ति शुद्धीकरण कसुरमा मुद्दा दर्ता भएको छ।

उकालो

आइतबार, ७ पुष, २०८१

रवि लामिछानेसहित ४ जनाविरुद्ध सम्पत्ति शुद्धीकरण कसुरमा मुद्दा दायर

गण्डकी– पोखराको सूर्यदर्शन सहकारी ठगी प्रकरणमा मुछिएका राष्ट्रिय स्वतन्त्र पार्टीका सभापति एवं पूर्वगृहमन्त्री रवि लामिछानेसहित चार जनाविरुद्ध सम्पत्ति शुद्धीकरण कसुरमा जिल्ला अदालत कास्कीमा मुद्दा दायर गरिएको छ। 

जिल्ला सरकारी वकिल कार्यालयका सहायक जिल्ला न्यायाधिवक्ता शान्तिदेवी शर्माले लामिछानेसँगै रामबहादुर खनाल, छविलाल जोशी र लीला पछाइविरुद्ध आइतबार सम्पत्ति शुद्धीकरणको मुद्दा दायर गरिएको जनाकारी दिइन्।  

पूर्वगृहमन्त्री लामिछानेमाथि २७ करोड ८९ लाख ४४ हजार ७०० रुपैयाँ बिगो दाबीसहित मुद्दा दर्ता गरिएको उनले बताइन्। यस्तै, जोशीविरुद्ध ७४ करोड ३४ लाख ७१ हजार रुपैयाँभन्दा बढी बिगो दाबीसहित मुद्दा दायर गरिएको छ। अन्य व्यक्तिलाई पनि कसुरअनुसारको बिगो र सजायको मागसहित अभियोगपत्र दर्ता गरिएको सहायक जिल्ला न्यायाधिवक्ता शर्माले बताइन्। 

लामिछानेसहित १९ जनाविरुद्ध संगठित अपराधमा र ३१ जनाविरुद्ध सहकारी ठगीमा मुद्दा दायर गरिएको छ। सरकारी वकिल कार्यालयका अनुसार सहकारी ठगी प्रकरणमा हालसम्म ६३ जनाविरुद्ध जिल्ला अदालत कास्कीमा मुद्दा दायर गरिएको छ। 

जिल्ला अदालतका सूचना अधिकारी सुरज अधिकारीले सहकारी ठगी, संगठित अपराध र सम्पत्ति शुद्धीकरणको कसुरमा सभापति लामिछानेसहित विभिन्न व्यक्तिविरुद्ध सजायको माग दाबीसहित अभियोगपत्र दर्ता भएको बताए। 

सहकारी बचत रकम अपचलन गरेको आरोपमा सभापति लामिछाने गत कात्तिक २ गते काठमाडौँबाट पक्राउ परेका थिए। उनीमाथि कास्कीसहित अन्य जिल्लासमेत सहकारी ठगीको आरोपमा अनुसन्धान भइरहेको छ।

प्रतिक्रिया दिनुहोस !