दमकमा दीर्घरोगी र सुत्केरीलाई निःशुल्क रगत

गौरादह– नेपाल रेडक्रस सोसाइटी दमक उपशाखाले दीर्घरोगीका लागि निःशुल्क रगत उपलब्ध गराउने भएको छ।

दमक नगरपालिका र रेडक्रसबीच सुत्केरी, पाँच वर्षमुनिका बालबालिका, दीर्घरोगीका लागि निःशुल्क रगत उपलब्ध गराउने सम्झौता भएको हो।रेडक्रसले ल्याब परीक्षण गरेबापत सेवा शुल्क ९५० रुपैयाँ लिने गरेको थियो।

रेडक्रस दमक उपशाखाका सभापति प्रकाश बुढाथोकीले नगरपालिकासँग समन्वय गरेर रगत उपलब्ध गराउन लागिएको बताए। सुत्केरी, नियमित रगत चढाउनुपर्ने, पाँच वर्षमुनिका बालबालिकाका लागि निःशुल्क उपलब्ध गराउने सहमति भएको उनले बताए। त्यसका लागि दमकमा स्थायी बसोबासको प्रमाण पेस गर्नुपर्ने छ।

दमककी उपमेयर रेगिना भट्टराई, प्रमुख प्रशासकीय अधिकृत शशी राई, दमक रेडक्रसका पूर्वसभापति लिला गुरागाईंको उपस्थितिमा सहमतिपत्रमा हस्ताक्षर भएको हो। दमक रेडक्रसले रक्तसञ्चार र सर्पदंश उपचार सेवा सञ्चालन गर्ने गरेको छ।