साफ यू-१९ पुरुष फुटबल प्रतियोगिता नेपालमा आयोजना हुने

सन् २०२३ मा आयोजना हुने साफ यू-१९ पुरुष फुटबल प्रतियोगिता नेपालमा आयोजना हुने भएको छ।

दक्षिण एसियाली फुटबल महासंघ (साफ)ले आइतबार २०२३ को वार्षिक खेल तालिका सार्वजनिक गर्दै यू-१९ पुरुष फुटबल प्रतियोगिताको आयोजनाको अधिकार नेपाललाई दिएको हो।

उक्त प्रतियोगिता जुलाई १ देखि १३ सम्म आयोजना हुने साफले जनाएको छ। यता, साफ यू-२० महिला फुटबल प्रतियोगिता भने बंगलादेशले आयोजना गर्ने भएको छ। यस्तै, यू-१७ महिला फुटबल आयोजनाको अधिकार पनि बंगलादेशले नै पाएको छ।

यू-२० महिला फुटबल प्रतियोगिता ३ फेब्रुअरीदेखि १४ फेब्रुअरीसम्म आयोजना हुने छ। यू-१७ महिला फुटबल प्रतियोगिता भने २० मार्चदेखि ३१ मार्चसम्म बंगलादेशमा आयोजना हुनेछ।

साफ यू-१६ महिला फुटबल प्रतियोगिताको आयोजना भने भुटानले गर्ने भएको छ। उक्त प्रतियोगिता १ सेप्टेम्बरदेखि १३ सेप्टेम्बरसम्म आयोजना हुनेछ।