भर्ना अभियान अघि नै विद्यार्थीको हातमा पाठ्यपुस्तक पुर्‍याउने तयारी

भक्तपुर– जनक शिक्षा सामग्री केन्द्र लिमिटेडले शैक्षिक सत्र २०८१ शुरू हुनुअगावै विद्यार्थीको हातहातमा पाठ्यपुस्तक पुर्‍याउने जनाएको छ। यसका लागि चैत १५ भित्र पाठ्यपुस्तक छपाइ सम्पन्न गरेर उपत्यकाबाहेक सातवटै प्रदेशमा रहेका नौवटा वितरण केन्द्रबाट चैत १६ गतेदेखि वितरण शुरू गर्ने केन्द्रका प्रबन्ध निर्देशक अनिलकुमार झाले बताए। 

“हामीले जिम्मेवारी पाएको कक्षा ५ देखि १० सम्मका सम्पूर्ण सेटमै ९५ प्रतिशत पाठ्यपुस्तक छपाइ सकेका छौँ। चैत १५ भित्र बाँकी पाँच प्रतिशत पुस्तक पनि छपाइ सक्छौँ,” उनले भने, “चैत १५ गतेदेखि नै पुस्तक वितरण थाल्छौँ। शैक्षिक सत्र शुरू हुँदासम्म पूरै सेटमा सबै कक्षाका विद्यार्थीको हातहातमा पाठ्यपुस्तक पुर्‍याउँछौँ।”

केन्द्रले अहिले चौबिसैँ घण्टा छापाखाना सञ्चालन गरेर दैनिक एक लाख थान पुस्तक छपाइ गरिरहेको छ। आउँदो शैक्षिक सत्रका लागि एक करोड ७५ लाख थान पाठ्यपुस्तक छपाइ गर्नुपर्नेमा एक करोड ५७ लाख थान पाठ्यपुस्तक छपाइ सकेको छ।

पुस्तक वितरण भने पहिलो प्राथमिकता हिमाली क्षेत्र, दोस्रोमा पहाडी क्षेत्र र तेस्रोमा तराईमा र अन्तमा उपत्यकामा गरिने भएको छ। 

छपाइ सकिएका पुस्तक सातवटै प्रदेशका केन्द्रका प्रादेशिक कार्यालयको गोदाममा पुर्‍याउने काम भइरहेको छ। “गत वर्षजस्तै यस वर्ष पनि कुनै पनि कक्षाको कुनै पनि विषयको पुस्तक अभाव हुन नदिने र सेटमै पुस्तक उपलब्ध गराउने छौँ। कुनै पनि पुस्तक यस वर्ष पनि अभाव हुँदैन,” प्रबन्ध निर्देशक झाले भने। 

उनले कक्षा १ देखिकै पुस्तक छपाइको जिम्मेवारी दिन सरकारसँग माग गरेको भए पनि कक्षा ५ देखिको मात्रे जिम्मेवारी पाएको बताए। कक्षा १ देखिकै पुस्तक छपाइको जिम्मेवारी दिए पनि फागुन भित्रै पुस्तक पछाइ सम्पन्न गरेर चैतमा वितरण सम्पन्न गर्नसक्ने उनको दाबी छ। 

 

सरकारले गत वर्ष निजी क्षेत्रका छापाखानालाई कक्षा १ देखि ५ सम्मका पाठ्यपुस्तक छपाइको जिम्मा दिए पनि यस वर्ष त्यसलाई खुम्च्याउँदै कक्षा १ देखि ४ सम्मको मात्रै दिएको छ।