सीके राउतले अग्रता लिइरहेको सप्तरी-२ मा मतगणना रोकियो

काठमाडौँ- सप्तरी-२ मा प्रतिनिधिसभा सदस्य पदका लागि जारी मतगणना रोकिएको छ। ३९ हजार ८१९ मतको गणना भइसकेपछि जनता समाजवादी पार्टीका नेताहरूले मतपेटिकाको सिल नमिलेको भन्दै विवाद उत्पन्न गरेपछि मतगणना रोकिएको हो।

जसपाका नेता/कार्यकर्ताले आफूहरूले टिपेको सिल नम्बर र मतगणना केन्द्रमा भएको सिल नम्बर नमिलेको भन्दै नाराबाजी गरेपछि गणना रोकिएको मुख्य निर्वाचन अधिकृतको कार्यालयले जनाएको छ।

जसपाका नेता/कार्यकर्ताहरूले केन्द्रअगाडि धर्नासमेत शुरू गरेका छन्।

सप्तरीका प्रमुख जिल्ला अधिकारी भूपेन्द्र थापाले गणना रोकिएको जानकारी गराए। “हाम्रो उम्मेदवारका प्रतिनिधि र यहाँ भएको सिलमा शंका छ भन्ने उहाँहरूको कुरा आएको छ”, प्रमुख जिल्ला अधिकारी थापाले भने, “उहाँहरूले कहाँ यस्तो भयो भन्ने पनि देखाउन सकिरहनुभएको छैन।”

“निर्वाचन आयोगबाट मुख्य निर्वाचन अधिकृतलाई पठाएको ओसी मिलाएर त्यो ओसी र मतपेटिकामा गरेका सिलहरूको भरिफाई हुने गरेको तर उनीहरूले हामीले टिपेकोमा भरिफाई हुनुपर्छ भनिरहेका छन्”, थापाले भने।

प्रमुख जिल्ला अधिकारी थापाले मतगणना रोकेर यस विषयमा छलफल भइरहेको बताए। 

जसपा क्षेत्र नम्बर २ का अध्यक्ष नारायण यादवले सिलबन्दी भेरिफिकेशन नभएसम्मका लागि मतगणना प्रक्रिया स्थगित गरी पाउँ भन्दै मुख्य निर्वाचन अधिकृतलाई निवेदन समेत दिएका छन्। यादव मतगणना प्रतिनिधिसमेत हुन्।