नयाँ भवनमा सरेसँगै प्रधानमन्त्रीले भने– सरकारको काम र गुण पनि नयाँ ढंगबाट अघि बढ्छ

काठमाडाैँ– प्रधानमन्त्री पुष्पकमल दाहाल 'प्रचण्ड'ले सरकारको कामको प्रकृति र गुण नयाँ ढंगबाट अघि बढाउने प्रतिबद्धता व्यक्त गरेका छन्।

बुधबार सिंहदरबारमा पश्चिमतर्फको (रेट्रोफिटिङ भएको) भागमा बनाइएको कार्यालयमा सरेसँगै उनले सरकारका कामकारबाही अब नयाँ ढंगबाट अघि बढाउने बताएका हुन्। उनले प्रधानमन्त्री तथा मन्त्रिपरिषद्को कार्यालय मात्रै नसारिएको बताउँदै कामको प्रकृति र गुण पनि अब नयाँ ढंगले अघि बढाउने संकल्प पनि रहेको बताए। उनले पुरानो प्रधानमन्त्री तथा मन्त्रिपरिषद्को कार्यालयमा गुम्म परेर बस्नुपरेको अनुभव सुनाउँदै अब ताजा भइ काम गर्न पाएको महसुस गरेको बताए। 

"मलाई कता कता पहिलेको ठाउँमा बस्दा गुम्म परेको, त्यति फ्रेस नहुने जस्तो लाग्थ्यो, यो ठाउँमा आउँदा अलिकति सबैतिर देखिने, निस्किएर हेर्न पाइने, स्पेस पनि ठूलो कारणले अलि बढी दिमाग फुर्छ भन्ने महसुस गरेको छु। नयाँ शुभारम्भले नयाँ गति पक्रिने र हाम्रो एकता अझ बलियो हुनेछ," उनले भने।

सञ्चारकर्मीहरूसँग कुरा गर्दै शहरी विकासमन्त्री सीता गुरुङले नयाँ प्रधानमन्त्री तथा मन्त्रिपरिषद्को कार्यालयको  प्रबलीकरण गर्ने काम लगभग पूरा भएको जानकारी दिइन्। उनले पहिलो चरणको आयोजनाको ठेक्काअनुसार ४२ करोड हाराहारीको रकममा प्रबलीकरण गर्ने काम सम्पन्न भएको उल्लेख गरिन्।

उनले भनिन्, "२०७२ सालको भूकम्पले क्षतविक्षत भएको संरचनाको प्रबलीकरण गर्ने काम लगभग पूरा भएको छ। बाँकी नसकिएको भनेको इन्टेरियरको संरचना बनाउनु पर्नेछ, त्यसका लागि अर्को आयोजनाका लागि ठेक्का अघि बढाएकाले अलि सम्पन्न भएको होइन की भन्ने देखिन्छ, तर जुन ४२ करोड हाराहारीको रकममा प्रबलीकरण गर्ने भन्नेकुरा सम्पन्न भएको छ।" 

वि.स. २०७२ सालमा गएको भूकम्पबाट क्षति भएको संरचनालाई रेट्रोफिटिङ गरेर अहिले प्रधानमन्त्री कार्यालयलाई सोही भावनामा सारिएको हो।