बालगोपालेश्वरमा यसरी लगाइँदैछ भाइटीका (तस्वीरहरू)

काठमाडौँ– काठमाडौँको रानीपोखरीको बीचमा रहेको बालगोपालेश्वर मन्दिरमा भाइटीका लगाउनेको भिड लागेको छ। भाइटीकाको शुभ साइत १०:५१ मा रहे पनि बालगोपालेश्वर मन्दिर भने बिहानैदेखि खुलेको थियो। 

वर्षमा एक दिन भाइटीकाका दिन मात्रै खुल्ने यो मन्दिरमा दिदीबहिनी नहुनेहरूले यहाँ टीका लगाउने गर्छन्। मन्दिर परिसरमा टीका र फूलमाला लिएर बसेकासँग टीका थाप्ने गरिन्छ। टीका लगाएर मन्दिरमा पूजा, दर्शन गर्ने चलन छ। 

बालगोपालेश्वर मन्दिर वर्षमा एकपटक आजैका दिन मात्र खोल्ने प्रचलन छ। पूजा गर्ने र टीकाको व्यवस्थापन काठमाडौँ महानगरपालिकाले मिलाएको छ। मन्दिर बेलुकासम्म नै खुला रहने महानगरले जनाएको छ। २०७२ वैशाख १२ गतेको भूकम्पका कारण त्यसै वर्षको तिहारदेखि केही वर्ष सो मन्दिर बन्द गरिएको थियो। 

२०७७ सालमा पुनर्निर्माण सम्पन्न भएपछि भक्तजनका लागि खुला हुँदै आएको छ। सो वर्ष भने दुई दिन खुला गरिएको थियो। २०३५ सालपछि नियमित रूपमा रानीपोखरीभित्रको बालगोपालेश्वर मन्दिर खुल्न थालेको हो।

प्रताप मल्लका छोरा चक्रवर्तेन्द्र मल्लको निधनपछि रानीको चित्त बुझाउन १७२७ सालमा रानीपोखरीको निर्माण गराएको शिलालेखमा उल्लेख छ। पोखरीको बीचमा त्यसैबेला बालगोपालेश्वर मन्दिर स्थापना गरिएको हो।

दिदीबहिनीले दाजुभाइलाई तेलको धाराले छेकेर परम्पराअनुसार सप्तरंगी टीका, मखमली, सयपत्री वा गोदावरीलगायत फूलका माला लगाइदिने गरिन्छ। 

दिदीबहिनीले दाजुभाइलाई ओखर, कटुस, मरमसला एवं सेलरोटीलगायत खानेकुरा दिने र दाजुभाइले पनि सौभाग्यका प्रतीक कपडा र दक्षिणा दिएर सम्मान प्रकट गर्ने धार्मिक एवं सामाजिक परम्परा छ।