मधेश प्रदेश सरकारले माग्यो छुट्टै प्रहरी प्रशासन

धनुषा– मधेश प्रदेश सरकारले आफ्नो छुट्टै प्रहरी प्रशासनको माग गर्दै संघीय सरकारको ध्यानाकर्षण गराएको छ। मुख्यमन्त्री सरोजकुमार यादवले यसका लागि प्रधानमन्त्रीलाई बिहीबार ज्ञापनपत्र बुझाउने जानकारी दिएका छन्।

बुधबार पत्रकार सम्मेलन गर्दै मुख्यमन्त्री यादवले प्रदेशको आफ्नो छुट्टै कर्मचारी, प्रहरी प्रशासन र साधनस्रोत नहुँदा आवश्यक काम गर्न नसकेको बताए। उनले निजामती ऐन र प्रहरी समायोजनका लागि संघीय सरकारलाई एक महिने अल्टिमेटम दिँदै  बिहीबार ज्ञापनपत्र बुझाउन लागिएको उल्लेख गरे। यो मागमा प्रतिपक्षी दलको पनि साथ रहेको भन्दै एक महिनाभित्र माग पूरा नगरे संघीय सरकारविरुद्ध आन्दोलन गर्ने मुख्यमन्त्री यादवले चेतावनी दिए। 

"उस्तै परेमा संघीय राजधानी र जनकपुरमा मात्रै होइन, गाउँगाउँमा आन्दोलन हुन्छ," यादवले पत्रकारहरूसँग भने।