जलवायु अनुकूलनको लागि छुट्याइएको रकम नेपालले पाउनुपर्छः महासचिव गुटेरेस

काठमाडाैँ– संयुक्त राष्ट्रसंघका महासचिव एन्टोनियो गुटेरेसले जलवायु अनुकूलनको लागि छुट्याइएको कोषको रकम नेपालले पाउनुपर्ने बताएका छन्।

मंगलबार अन्नपूर्ण बेसक्याम्प अवलोकन भ्रमणपछि पोखरामा सञ्चारमाध्यमहरुसँग कुरा गर्दै उनले यस्तो बताएका हुन्। महासचिव गुटेरेसले जलवायु अनुकूलनको लागि बनाइएका कोषहरूको रकम जलवायु परिवर्तनका कारण पीडित बनेका नेपाल लगायतका देशहरूले पाउनुपर्नेमा जोड दिए। उनले जलवायु परिवर्तनका कारण पीडित बनेको नेपाललाई समर्थन गर्न अन्य देशहरूलाई आग्रहसमेत गरे। उनले जलवायु परिवर्तनको असर कम गर्न हिमाल र हिमनदी जोगाउनुपर्ने बताए।

"हामीले यी अद्भुत हिमालहरू र यी अद्भुत हिमनदीहरू जोगाउनुपर्छ। जलवायु परिवर्तनका कारण पीडित बनेका नेपाल र नेपालजस्ता अन्य देशहरूलाई समर्थन गर्न आवश्यक छ। जलवायु परिवर्तनका कारण धेरै भागहरू भूस्खलन भएका छन्। धेरै समुदायमा जुन गहिरो रूपमा परेको नकारात्मक असर छ, यसलाई मैले अन्तर्राष्ट्रिय समुदायमा अपिल गर्नेछु," उनले भने, "पीडित समुदायको रक्षा गर्न र जलवायु अनुकूलनको लागि धेरै कोषहरू पनि छन्। यी कोषहरू क्षति कम गर्न र पीडित जनताको फाइदाका लागि बनाइएका हुन्। त्यसको उपयोग हुनुपर्छ।"

महासचिव गुटेरेसले जलवायु परिवर्तनको असरलाई कम गर्न प्रभावकारी ऐक्यवद्धता आवश्यक रहेको पनि उल्लेख गरे।