एलडीसी बैठक: वित्तीय एवं एकीकृत सहयोगमा नेपालको जोड

काठमाडौँ– नेपालले अल्पविकसित राष्ट्रहरू (एलडीसी)को विकासशील देशका रूपमा हुने रूपान्तरण समृद्ध समाज र दिगो विकासतर्फको गर्विलो यात्रा हुनुपर्नेमा जोड दिएको छ। साथै नेपालले अल्पविकसित देशलाई वित्तीय एवं एकीकृत सहयोग हुनुपर्नेमा विशेष जोड दिएको छ। 

अल्पविकसित, भूपरिवेष्टित विकासशील तथा साना टापु राष्ट्रका लागि राष्ट्रसंघीय उच्च प्रतिनिधिको कार्यालय र कतार कोषले दोहामा आयोजना गरेको अल्पविकसित देशको दिगो विकासका लागि विश्वव्यापी साझेदारी निर्माणसम्बन्धी बैठकअन्तर्गत बिहीबार भएको उच्चस्तरीय छलफलमा एलडीसी समूह अध्यक्षका रुपमा परराष्ट्रसचिव अमृतबहादुर राईले ती विषयमा जोड दिएका हुन्। 

परराष्ट्र मन्त्रालयका अनुसार बैठकका क्रममा परराष्ट्रसचिव राईले संयुक्त राष्ट्रसंघको प्रविधि बैंकका प्रबन्ध निर्देशक देवदत्त महाराजलाई भेटेर अल्पविकसित मुलुकबाट विकासशील देशमा रूपान्तरण हुने नेपालको यात्रालाई सहज बनाउन बैंकको सहयोगको अपेक्षा गरेको बताए। 

त्यस अवसरमा उनीहरूबीच बैंकको भूमिका र सहकार्यका अवसरबारे पनि छलफल भएको थियो।