हिउँ छिचोल्दै लाङटाङ (तस्वीरहरू)

काठमाडौँ– मनमोहक हिमशृंखलाको अवलोकन गर्न पाइने लाङटाङ पदमार्ग काठमाडौँबाट नजिकको गन्तव्य हो। असोज र कात्तिक महिना पदयात्राका लागि राम्रो सिजन मानिन्छ। यो सिजनमा यहाँ विदेशीभन्दा बढी नेपाली भेटिन्छन्।

लाङटाङ खोला सँगसँगै अघि बढ्छ लाङटाङ पदमार्ग। बीचबीचमा भेटिने अनुपम झरना र हिमशृंखलाले पर्यटकलाई आकर्षित गर्छन्। नजिकैबाट प्राकृतिक सौन्दर्य अवलोकन र अनुभूत गर्नका लागि लाङटाङ पदमार्ग प्रसिद्ध रहेको छ। 

क्यामेराका लेन्सले सुन्दर हिमाल, झरना, नदीनाला र प्राकृतिक सौन्दर्य  कैद गर्दै यात्रा गर्न सकिन्छ। एकैपटक आधा दर्जन हिमशृंखलाको अवलोकन गर्न सकिन्छ। बसोबासका लागि पर्याप्त होटल रहेका छन्। 

काठमाडौँको माछापोखरीबाट सार्वजनिक वा निजी सवारीसाधनमा जान सकिन्छ। माछापोखरीमा बिहान ६ देखि ९ बजेसम्म बस लाग्छ। बालाजु, कलंकी, थानकोट, गल्छी, नुवाकोट धुन्चे हुँदै ६ देखि ७ घण्टामा स्याफ्रुबेँसी पुगिन्छ। त्यसपछि शुरू हुन्छ पैदलयात्रा । स्याफ्रुबेँसीबाट ३ घण्टा पैदल यात्रापछि ब्याम्बोमा बास बस्न सकिन्छ। 

भोलिपल्ट उकाली ओराली गर्दै लाङटाङ वा क्यान्जिङ गुम्बा पुगिन्छ। यात्रामा लाङटाङ खोलाले साथ छोड्दैन। पहाडको च्यापबाट झरिरहेका झरना, चरा चुरुंगीका चिरबिरचिरबिर आवाजले मन शान्त बनाउँछ। यसरी अर्को दिन बिहानै क्यान्जिङ उपत्यकाबाट क्याजिङ री जान सहज हुन्छ। कतिपय भने क्यान्जिङ पुगेपछि यलापिक अथवा सेर्गोरीतर्फ जाने गर्छन्।