बैरागी काइँलालाई पहिचान सम्मान, गणेश राईलाई पहिचान युवा सम्मान

काठमाडौँ– पहिचान पुरस्कार कोषले प्रत्येक पाँच वर्षमा प्रदान गर्ने ‘पहिचान सम्मान’ यस वर्ष वरिष्ठ साहित्यकार, मुन्धुमविद् एवं नेपाल प्रज्ञा प्रतिष्ठानका पूर्वकुलपति बैरागी काइँला (तिलविक्रम नेम्वाङ सुब्बा)लाई प्रदान गर्ने भएको छ। 

कोषका संस्थापक नरेश काङमाङ राईका अनुसार, काइँलालाई पाँच लाख दुई हजार दुई रुपैयाँ र ताम्रपत्रसहित सम्मान गरिने भएको हो। यसअघि यो सम्मान लेखक तथा राजनीतिक विश्लेषक खगेन्द्र सङ्ग्रौलालाई प्रदान गरिएको थियो।

कोषले यसै वर्षदेखि ४० वर्ष मुनिका युवालाई ‘पहिचान युवा सम्मान’समेत प्रदान गर्ने घोषणा गरेको छ। पहिचानको आन्दोलन र लेखनमा योगदान पुर्‍याएबापत यस वर्षको पहिलो युवा सम्मान गणेशकुमार राई (गीलुरातोस)लाई प्रदान गरिनेछ। 

युवा सम्मानअन्तर्गत राईलाई ५० हजार २०२ राशि र ताम्रपत्र प्रदान गरिने कोषले प्रेस विज्ञप्तिमार्फत जनाएको छ। कोषले निरन्तर चार वर्ष पहिचान पुरस्कार प्रदान गर्छ भने प्रत्येक पाँच वर्षमा पहिचान सम्मान दिँदै आएको छ। 

यसअघि राजन मुकारुङ, अर्जुन खालिङ, यज्ञश, सरस्वती प्रतीक्षा, श्याम शाह, अनन्त वाग्ले, कविता राई, अमित थेवे, प्रगति राई, प्रकाश गुरागाईं र राजु स्याङ्तानका कृतिले पहिचान पुरस्कार प्राप्त गरिसकेका छन्।