एलन मस्क बन्लान् पहिलो खर्बपति?

यो तलब प्याकेजले मस्कलाई दीर्घकालीन रूपमा टेस्लासँग बाँधिराख्ने अपेक्षा गरिएको छ। तर कम्पनीको भविष्य बजारको प्रवृत्ति, प्राविधिक नवप्रवर्तन र विश्वव्यापी आर्थिक स्थिरतामा निर्भर रहनेछ।

उकालो

शुक्रबार, २१ कात्तिक, २०८२

एलन मस्क बन्लान् पहिलो खर्बपति?

विद्युतीय सवारी निर्माता कम्पनी टेस्लाका शेयरधनीले कम्पनीका प्रमुख कार्यकारी अधिकृत (सीईओ) एलन मस्कका लागि ऐतिहासिक तलब प्याकेज स्वीकृत गरेका छन्। 

उक्त स्वीकृतिले टेस्लाले तय गरेका महत्त्वाकांक्षी आर्थिक लक्ष्य पूरा गरेमा मस्कलाई विश्वको पहिलो खर्बपति बनाउने सम्भावना देखाएको छ।

टेस्लाको वार्षिक शेयरधनी बैठक बिहीबार सम्पन्न भएको थियो। बैठकमा करिब ७५ प्रतिशतभन्दा बढी शेयरधनीले मस्कको स्टक–आधारित क्षतिपूर्ति योजनाको समर्थनमा मतदान गरे। परिणाम घोषणा भएपछि हल उत्साह र हर्षध्वनिले गुञ्जायमान भएको बताइएको छ।

“म यो समर्थनका लागि अत्यन्त आभारी छु,” मस्कले मतदानपछि शेसेयरधनी र टेस्लाको सञ्चालक मण्डललाई धन्यवाद दिँदै भने। 

मासिक तलब वा बोनस नलिने मस्कको आम्दानी पूर्ण रूपमा कम्पनीका शेयर विकल्पमा आधारित छ। नयाँ स्वीकृत प्याकेजअन्तर्गत टेस्लाले यदि ८५ खर्ब अमेरिकी डलरको बजार मूल्य हासिल गर्न सफल भएमा उनलाई आगामी दशकमा ४२ करोड ३७ लाख टेस्ला शेयर प्राप्त हुनेछ। सको मूल्य करिब १० खर्ब अमेरिकी डलर बराबर हुनेछ।

यो लक्ष्य पूरा गर्नका लागि टेस्लाको शेयर मूल्य हालको स्तरबाट करिब ४६६ प्रतिशतले बढ्नुपर्नेछ। जसले कम्पनीलाई हाल विश्वकै सबैभन्दा ठूलो मूल्यांकन भएका एनभिडियाभन्दा पनि माथि पुर्‍याउनेछ। एनभिडियाको बजार मूल्य हाल करिब ५० खर्ब अमेरिकी डलर रहेको छ।

यदि मस्कले स्टक अवार्डका सबै १२ किस्ता प्राप्त गरे भने उनको दैनिक औसत आय करिब २७ करोड ५० लाख अमेरिकी डलर पुग्नेछ। यसलाई इतिहासकै सबैभन्दा ठूलो कार्यकारी तलब सम्झौता मानिनेछ।

टेस्लाको सञ्चालक मण्डलले शेसेयरधनीलाई चेतावनी दिँदै उक्त योजना अस्वीकृत भए मस्क कम्पनीबाट टाढा जान सक्ने सम्भावना रहेको बताएका थिए। नियामक कागजातमा बोर्डले कि मस्कले आफूलाई प्रदान हुने नियन्त्रण र दीर्घकालीन प्रोत्साहनबिना सीईओको रूपमा निरन्तर रहनुपर्नेबारे चिन्ता व्यक्त गरेको उल्लेख छ।

यद्यपि, यस्तो ऐतिहासिक स्वीकृतिका बीच पनि टेस्लाले चुनौतीपूर्ण वर्षको सामना गरिरहेको छ। सन् २०२५ मा विद्युतीय सवारीको सुस्त बजार माग, प्रतिस्पर्धाको तीव्रता र अमेरिकी सरकारको विद्युतीय सवारीप्रति प्रोत्साहनमा आएको कमीका कारण कम्पनीको बिक्री र नाफामा उल्लेखनीय गिरावट आएको सीएनएनले जनाएको छ।

विश्लेषकका अनुसार यो तलब प्याकेजले मस्कलाई दीर्घकालीन रूपमा टेस्लासँग बाँधिराख्ने अपेक्षा गरिएको छ। तर कम्पनीको भविष्य अब पनि बजारको प्रवृत्ति, प्राविधिक नवप्रवर्तन र विश्वव्यापी आर्थिक स्थिरतामा निर्भर रहनेछ। (रासस/एएनआई) 

प्रतिक्रिया दिनुहोस !