विसु पर्व नजिकिएसँगै सुदूरपश्चिममा बढ्यो चहलपहल

डडेल्धुरा– विसु पर्व नजिकिएसँगै सुदूरपश्चिममा चहलपहल बढेको छ। घर लिपपोतदेखि रोजगारी, शिक्षालगायतका प्रयोजनका लागि बाहिर रहेकाहरू घर फर्केने क्रम बढेसँगै चहलपहल बढेको हो।

विसु पर्व सुदूरपश्चिमेलीले धुमधामसँग मनाउँछन्। विसु पर्व आउनुपूर्व नै सुदूर पहाडका घर रातो माटो र कमेरो माटोले रंगिन थालेका छन्। नयाँ वर्ष आउनुभन्दा पहिले नै घर लिपपोत गरेमा वर्षभरि नै सुख, शान्ति र समृद्धि कायम हुन्छ भन्ने जनविश्वास रहेको पण्डित करुणाकर अवस्थी बताउँछन्।

चैत शुरू भएदेखि नै घर लिप्ने र पोत्ने काम शुरू हुन्छ भने यो काम चैत महिनामा नै सक्नुपर्छ। पाटन नगरपालिका–१० का सीता भट्टले लगभग तीन घण्टा हिँडेर कमेरो र रातोमाटो ल्याइ घर लिपेको बताइन्। पछिल्लो समयमा घर निर्माणमा सिमेन्टको प्रयोग बढ्न थालेपछि कमेरो र रातोमाटोको प्रयोग पनि घट्दै गएको उनको भनाइ छ।

चैत शुरू भएपछि घर लिपपोत गर्नका लागि धेरै टाढासम्म कमेरो र रातोमाटो लिन जाने गरेको पाटन–८ की लक्ष्मी भट्टले बताइन्। “बरु बडादशैँका बेलामा खासै लिपपोत गर्दैनौँ, तर चैतमा त जसरी नि लिप्नुपर्छ। कमेरोले घरको माथिल्लो भाग र रातोमाटोले घरको तल्लो भागमा लिप्ने पोत्ने चलन छ,” भट्टले भनिन्, “अब यो चलन कम होला जस्तो छ, धेरैजसोले पुराना घरमा लगाएको माटो उप्काएर सिमेन्ट लगाएका छन्।”

नयाँ वर्ष तथा विसु पर्वमा भारत गएकाहरू घर फर्किने चलन छ। बिहे गरेर गएका छोरी चेलीसमेत विसु पर्वको अवसरमा माइत जाने चलन छ। विसु तिहारकै दिन कूलदेवताको पूजा गरी ‘गतानी डुब्का’ (स्थानीय खानाको परिकार) खाने चलन छ।

विसु पर्वका अवसरमा सुदूरपश्चिमका डोटी, दार्चुला, अछाम, डडेलधुरा, बझाङ, बाजुरा, बैतडी, कैलाली र कञ्चनपुर जिल्लामा बसोबास गर्दै आएका पहाडी समुदायले सिस्नु लगाउने प्रचलन पनि छ।